‘जनावरे बांधा, नाहीतर कारवाईला सामोरे जा!’ : अमळनेर नगर परिषदेचा जनावरांच्या मालकांना स्पष्ट इशारा

अमळनेर  : अमळनेर नगर परिषद हद्दीत रस्त्यावर मोकाट जनावरे सोडणाऱ्या जनावरांच्या मालकांविरुद्ध आता दंडात्मक कारवाई करण्यात येणार आहे. रस्त्यांवर गाय, बैल तसेच इतर मोकाट जनावरे फिरत असल्याने वाहतुकीस अडथळा निर्माण होण्याबरोबरच नागरिकांच्या सुरक्षिततेचा प्रश्न निर्माण झाला आहे.

या पार्श्वभूमीवर अमळनेर नगर परिषदेने शहरातील सर्व नागरिक व जनावरांच्या मालकांना आपली जनावरे रस्त्यावर मोकाट सोडू नयेत, असे आवाहन केले आहे. जनावरांना सुरक्षित ठिकाणी बांधून ठेवून त्यांची योग्य व्यवस्था करण्याच्या सूचना देण्यात आल्या आहेत.

यापुढे नगर परिषद हद्दीत रस्त्यावर मोकाट जनावरे आढळून आल्यास नगर परिषद पथकाकडून ती पकडून नियमानुसार गोशाळेत जमा करण्यात येणार आहेत. तसेच संबंधित जनावरांच्या मालकांविरुद्ध लागू नियमांनुसार दंडात्मक कारवाई केली जाणार असून, कारवाईदरम्यान होणारा खर्चही संबंधित मालकाकडून वसूल करण्यात येणार असल्याचे नगर परिषदेने स्पष्ट केले आहे.

“जनावरे रस्त्यावर सोडू नका; स्वतःची तसेच नागरिकांची सुरक्षितता जपा,” असे आवाहन अमळनेर नगर परिषदेने केले आहे.