सामाजिक न्याय विभागाच्या योजनांची विद्यार्थ्यांना माहिती राणी लक्ष्मीबाई महाविद्यालयात स्वाधार योजना व शिष्यवृत्ती विषयक कार्यशाळा उत्साहात

   पारोळा : महाराष्ट्र शासनाच्या सामाजिक न्याय व विशेष सहाय्य विभागाच्या समाजकल्याण कार्यालय, जळगाव यांच्या वतीने राणी लक्ष्मीबाई महाविद्यालयात सामाजिक न्याय विभागाच्या विविध योजना व शिष्यवृत्तींबाबत मार्गदर्शनपर कार्यशाळा घेण्यात आली.

    कार्यशाळेत अनुसूचित जाती व नवबौद्ध प्रवर्गातील विद्यार्थ्यांसाठी असलेल्या भारतरत्न डॉ. बाबासाहेब आंबेडकर स्वाधार योजनेची सविस्तर माहिती देण्यात आली. शिक्षण घेताना विद्यार्थ्यांना भोजन, निवास, शैक्षणिक साहित्य, निर्वाह भत्ता तसेच इतर आवश्यक सुविधांसाठी या योजनेअंतर्गत ३८ हजार ते ६० हजार रुपयांपर्यंत आर्थिक सहाय्य दिले जात असल्याची माहिती देण्यात आली. तसेच विविध शिष्यवृत्ती व विशेष योजनांची पात्रता, लाभ घेण्याची प्रक्रिया आणि उपलब्ध सुविधांबाबत विद्यार्थ्यांमध्ये जनजागृती करण्यात आली.

   सामाजिक न्याय विभागाचे पारोळा तालुका समन्वयक आक्रम मुजावर, अमळनेर तालुका समन्वयक नितीन भोई आणि एरंडोल तालुका समन्वयक शांताराम हटकर यांनी स्वाधार योजना, विशेष शिष्यवृत्ती तसेच विद्यार्थ्यांसाठी असलेल्या विविध शासकीय योजनांची सविस्तर माहिती दिली.

    कार्यक्रमाच्या अध्यक्षस्थानी महाविद्यालयाचे प्राचार्य डॉ. व्ही. आर. पाटील होते. यावेळी कनिष्ठ महाविद्यालयाच्या उपप्राचार्य डॉ. वंदना पाटील, कनिष्ठ महाविद्यालयाचे शिष्यवृत्ती नोडल अधिकारी डॉ. ईश्वर पाटील, वरिष्ठ महाविद्यालयाचे शिष्यवृत्ती नोडल अधिकारी प्रा. डॉ. संभाजी सावंत, तसेच पी. पी. पाटील, प्रा. आर. बी. पाटील आदी उपस्थित होते.

    कार्यक्रमाचे प्रास्ताविक व सूत्रसंचालन वरिष्ठ विभागातील शिष्यवृत्तीचे कामकाज पाहणारे प्रसाद पाटील यांनी केले, तर आभार कनिष्ठ विभागातील शिष्यवृत्तीचे कामकाज पाहणारे गणेश खैरनार यांनी मानले.

   कार्यशाळेच्या यशस्वीतेसाठी महाविद्यालयातील वरिष्ठ व कनिष्ठ विभागातील प्राध्यापक तसेच शिक्षकेतर कर्मचारी चंद्रकांत निकम, सुधाकर गजरे आणि सर्व शिक्षकेतर कर्मचाऱ्यांचे सहकार्य लाभले.