अमळनेर: देशभरात गाजत असलेल्या पेपर लीक प्रकरणाच्या पार्श्वभूमीवर दिल्लीतील जंतर-मंतर येथे केंद्रीय शिक्षण मंत्री धर्मेंद्र प्रधान यांच्या राजीनाम्यासाठी ज्येष्ठ वैज्ञानिक सोनम वांगचुक यांचे उपोषण सुरू होते. मात्र, हे उपोषण भाजप सरकारने बळाचा वापर करून दडपल्याचा आणि उपोषण मंडपातून त्यांना सक्तीने उचलून नेल्याचा आरोप करण्यात येत आहे. तसेच, या घटनेचा निषेध करणाऱ्या अभिजीत दिपके यांना मारहाण करून त्यांच्यावर शाईफेक करण्यात आली. या हुकूमशाही प्रवृत्तीचा आणि सरकारच्या निष्क्रियतेचा तीव्र निषेध करण्यासाठी उद्या, सोमवार दिनांक २० जुलै २०२६ रोजी सकाळी ११:०० वाजता अमळनेर शहरात भव्य निषेध मोर्चाचे आयोजन करण्यात आले आहे.

हा मोर्चा अमळनेर तालुक्यातील महाविकास आघाडी आणि तालुक्यातील जागृत तरुणांच्या वतीने काढण्यात येत आहे. शहरातील जिल्हा परिषद विश्रामगृहाच्या समोरून या निषेध मोर्चाला सुरुवात होईल.

तरुणांच्या भविष्याशी खेळणाऱ्या पेपर लीक प्रकरणाचा जाब विचारण्यासाठी आणि लोकशाही मार्गाने सुरू असलेले आंदोलन चिरडणाऱ्या सरकारचा निषेध करण्यासाठी तालुक्यातील सर्व राजकीय पक्षांचे पदाधिकारी, कार्यकर्ते, तरुण-तरुणी, विद्यार्थी आणि सामाजिक कार्यकर्त्यांनी या मोर्चात मोठ्या संख्येने सहभागी व्हावे, असे आवाहन करण्यात आले आहे.

प्रमुख आवाहनकर्ते:

नितीन निळे (शिवसेना उपजिल्हाप्रमुख)

राजेंद्र मराठे (शिवसेना तालुकाप्रमुख)

चंद्रशेखर भावसार (शिवसेना शहरप्रमुख)

“तरुणांच्या हक्कासाठी आणि न्यायासाठी सर्वांनी एकत्र यावे!”