अमळनेर बाजार समितीत १.५ कोटींचे ‘शेतकरी भवन’ मंजूर; केवळ ५ रुपयांत मिळणार भोजन!

अमळनेर : अमळनेर कृषी उत्पन्न बाजार समितीच्या परिसरात “राष्ट्रसंत तुकडोजी महाराज शेतकरी भवन” उभारण्यासाठी महाराष्ट्र शासनाने १ कोटी ५० लाख ३६ हजार ७८८ रुपयांच्या अंदाजपत्रकास प्रशासकीय मान्यता दिली आहे. सहकार, पणन व वस्त्रोद्योग विभागाने ८ जुलै २०२६ रोजी यासंदर्भातील शासन निर्णय (GR) प्रसिद्ध केला असून, यामुळे अनेक वर्षांपासून प्रलंबित असलेला हा प्रश्न अखेर मार्गी लागला आहे.

बातमीचे ठळक मुद्दे:

अनुदान व निधी: या प्रकल्पासाठी शासन ५० टक्के म्हणजेच ७५.१८ लाख रुपये अनुदान दोन टप्प्यांत देणार आहे. उर्वरित निधी बाजार समितीला स्वतःच्या निधीतून किंवा कर्जाच्या माध्यमातून उभा करावा लागेल.

शेतकऱ्यांसाठी सुविधा: या अत्याधुनिक शेतकरी भवनात शेतीमाल विक्रीसाठी येणाऱ्या सामान्य शेतकरी, महिला व हमाल-मापाडी यांच्यासाठी मुक्काम, विश्रांती आणि इतर मूलभूत सुविधा उपलब्ध असणार आहेत.

अवघ्या ५ रुपयांत जेवण: या भवनात शेतकऱ्यांसाठी भोजन व्यवस्था असेल. यामध्ये शासनाचे ४० रुपये आणि बाजार समितीचे ५ रुपये अनुदान असेल, ज्यामुळे शेतकऱ्यांना केवळ ५ रुपयांत दर्जेदार भोजन मिळेल.

मुदत: प्रशासकीय मान्यता मिळाल्यापासून एका वर्षाच्या आत हे बांधकाम पूर्ण करण्याचे बंधन बाजार समितीवर आहे. बांधकामापूर्वी सार्वजनिक बांधकाम विभागाची तांत्रिक मान्यता घेणे अनिवार्य आहे.

“गोरगरीब कष्टकरी शेतकऱ्यांसाठी ३ वर्षांच्या सातत्यपूर्ण पाठपुराव्याला अखेर यश आले आहे. या सुविधेमुळे अमळनेर परिसरातील हजारो शेतकऱ्यांना मोठा दिलासा मिळणार असून, दिलेला शब्द पूर्ण झाल्याचे समाधान आहे.”

— अशोक आधार पाटील, सभापती, कृषी उत्पन्न बाजार समिती, अमळनेर

या महत्त्वाकांक्षी प्रकल्पासाठी पणन मंत्री जयकुमार रावल, खासदार स्मिताताई वाघ आणि आमदार अनिलदादा पाटील यांचे विशेष सहकार्य व मदत लाभली असून, बाजार समितीच्या संचालक मंडळाने शासनाचे आभार मानले आहेत.