भुसावळ : रावेर तालुक्यातील बोरखेडा येथे संपूर्ण महाराष्ट्राला हादरवून सोडणाऱ्या चार अल्पवयीन भावंडांच्या हत्याकांड आणि बलात्कार प्रकरणातील नराधम आरोपीला भुसावळ सत्र न्यायालयाने आज ऐतिहासिक निकाल देत फाशीची शिक्षा सुनावली आहे. यासोबतच बलात्काराच्या गुन्ह्यासाठी आरोपीला जन्मठेपेची शिक्षाही ठोठावण्यात आली आहे.
या अत्यंत संवेदनशील आणि गुंतागुंतीच्या खटल्यात सरकार पक्षातर्फे सुप्रसिद्ध विशेष सरकारी वकील ॲड. उज्ज्वल निकम यांनी बाजू मांडली. त्यांनी न्यायालयात सादर केलेले पुरावे आणि केलेला युक्तिवाद ग्राह्य धरून न्यायालयाने आरोपीला ही कठोर शिक्षा सुनावली.
तपास अधिकाऱ्यांच्या चोख कामगिरीला यश
या गुन्ह्याचा तपास अत्यंत कौशल्याने आणि वेगाने पूर्ण करण्यात आला होता. तत्कालीन प्रभारी अधिकारी आणि प्राथमिक तपास अधिकारी रामदास वाकोडे (माजी पोलीस निरीक्षक, रावेर पोलीस ठाणे) यांनी घटनेचे गांभीर्य ओळखून तातडीने पुरावे गोळा केले. तसेच, तत्कालीन वरिष्ठ पोलीस अधिकारी आणि सध्याचे यवतमाळचे पोलीस अधीक्षक आयपीएस कुमार चिंता यांनी या प्रकरणाचा सखोल व तांत्रिक तपास केला होता. पोलीस पथकाने सादर केलेल्या भक्कम पुराव्यांमुळेच आरोपीला फाशीच्या फंद्यापर्यंत पोहोचवणे शक्य झाले.
