श्री मंगळग्रह मंदिरात भक्तीमय वातावरणात रुद्र महाभिषेक; आज सत्यनारायण महापूजा

   अमळनेर : येथील मंगळग्रह सेवा संस्था संचलित श्री मंगळग्रह मंदिरात श्रावण पर्वानिमित्त सोमवारी (दि. २४) भक्तीमय वातावरणात ‘रुद्र महाभिषेक’ संपन्न झाला. या पूजेचे विशेष मानकरी म्हणून शहराचे उपनगराध्यक्ष प्रशांत निकम व सौ. सोनालीताई निकम यांनी श्री मंगळेश्वर महादेवांच्या पिंडीवर विधिवत अभिषेक, पूजा-अर्चना व बिल्वार्चना केली.

संस्थेचे अध्यक्ष डॉ. डिगंबर महाले यांच्या मार्गदर्शनाखाली हा सोहळा पार पडला. पुरोहित शुभम वैष्णव, परशुराम शर्मा व गणेश जोशी यांनी पौरोहित्य केले. महाआरती आणि ‘हर हर महादेव’च्या जयघोषाने परिसर दुमदुमला होता. यावेळी उपाध्यक्ष एस. एन. पाटील, सचिव सुरेश बाविस्कर, सेवेकरी व भाविक मोठ्या संख्येने उपस्थित होते.

आज सत्यनारायण महापूजा

श्रावणानिमित्त मंगळवारी (दि. २५) सकाळी ९:३० वाजता मंदिरात श्री सत्यनारायण महापूजेचे आयोजन करण्यात आले आहे. या पूजेचे मानकरी नगरसेवक श्रीराम चौधरी व सौ. सुरेखाताई चौधरी असतील. भाविकांनी सकाळी ९ ते रात्री १० वाजेपर्यंत दर्शन व तीर्थप्रसादाचा लाभ घ्यावा, असे आवाहन विश्वस्त मंडळातर्फे करण्यात आले आहे.