अमळनेर : शहर स्वच्छ व सुंदर बनवण्यासाठी नगरपरिषदेकडून सुरू असलेल्या प्रयत्नांचे कौतुक होत असले, तरी दुसरीकडे काही ठिकाणी होत असलेल्या निकृष्ट व बेकायदेशीर बांधकामांवर नागरिक प्रश्न उपस्थित करत आहेत. मुंढेडा ग्लोबल हायस्कूल समोरील बाजूपासून ते ओम हाईट्स, मुंदडा २ च्या मागील बाजू ते प्रताप व्यायाम शाळा परिसरादरम्यान सुरू असलेल्या सांडपाणी नाल्याच्या बांधकामात मोठा गैरप्रकार होत असल्याचा गंभीर आरोप अखिल भारतीय सफाई मजदूर काँग्रेसचे महाराष्ट्र प्रदेश कार्यकारिणी सदस्य रघुनाथ रामभाऊ मोरे यांनी केला आहे. याप्रकरणी त्यांनी अमळनेर नगरपरिषदेचे मुख्याधिकारी तथा प्रशासक यांच्याकडे निवेदनाद्वारे चौकशीची मागणी केली आहे.
