आईच्या डोळ्यांदेखत काळाचा घाला! अमळनेर जवळील शहापूर येथे वीज पडून ३२ वर्षीय तरुणाचा जागीच मृत्यू

अमळनेर : तालुक्यातील शहापूर येथे आज, मंगळवार दि. २३ जून रोजी दुपारी बारा वाजेच्या सुमारास निसर्गाचा थरार पाहायला मिळाला. शेतात काम करत असताना अचानक आलेल्या वादळी पावसात वीज कोसळल्याने राकेश रतिलाल पाटील (वय ३२) या तरुण शेतकऱ्याचा जागीच दुर्दैवी मृत्यू झाला. आईच्या डोळ्यांदेखतच मुलावर काळाने झडप घातल्याने परिसरात प्रचंड हळहळ व्यक्त होत आहे.

दुचाकी सुरक्षित ठिकाणी लावताना घडली दुर्घटना

मिळालेल्या माहितीनुसार, शहापूर येथील राकेश पाटील हा आज आपल्या शेतात आई आणि इतर मजुरांसह शेतीकामासाठी गेला होता. दुपारी बारा वाजेच्या सुमारास अचानक ढगांच्या गडगडाटासह आणि विजेच्या कडाक्यासह मुसळधार पावसाला सुरुवात झाली. पाऊस सुरू झाल्याने राकेश आपली दुचाकी (मोटारसायकल) रस्त्यावर सुरक्षित ठिकाणी लावण्यासाठी घाईघाईने निघाला.

तो गाडीकडे जात असतानाच अचानक त्याच्या अंगावर थेट वीज कोसळली. हा विजेचा झटका इतका तीव्र आणि जबरदस्त होता की राकेशचा जागीच मृत्यू झाला, तसेच त्याच्या अंगावरील कपडे आणि बागायती रुमालही पूर्णपणे जळून खाक झाले.

आईच्या आक्रोशाने उपस्थितांचेही पाणावले डोळे

राकेश वीज कोसळून दूर फेकला गेला, तेव्हा त्याची आई आणि इतर मजूर बाजूलाच असलेल्या एका निंबाच्या झाडाखाली आसऱ्याला उभे होते. आपल्या तरुण मुलाला डोळ्यांसमोर मृत्यूच्या विळख्यात जाताना पाहून आईने केलेला आक्रोश काळजाचा थरकाप उडवणारा होता. या हृदयद्रावक घटनेने संपूर्ण शहापूर गावावर शोककळा पसरली आहे.

सायंकाळी शोकाकुल वातावरणात अंत्यसंस्कार

घटनेनंतर राकेशला तातडीने अमळनेर येथील ग्रामीण रुग्णालयात दाखल करण्यात आले, परंतु डॉक्टरांनी त्याला तपासून मृत घोषित केले. सायंकाळी उशिरा ७ वाजेच्या सुमारास शहापूर येथे अत्यंत शोकाकुल वातावरणात त्याच्यावर अंत्यसंस्कार करण्यात आला.

मागे राहिला परिवार:

मृत राकेशचा विवाह अवघ्या चार वर्षांपूर्वी झाला होता. त्याच्या पश्चात वृद्ध आई-वडील, पत्नी आणि दोन विवाहित बहिणी असा परिवार आहे. घराचा कर्ता आणि तरुण मुलगा गमावल्याने पाटील कुटुंबावर दुःखाचा डोंगर कोसळला आहे.