अमळनेर : शहरात आज ‘ईद-उल-अजहा’ (बकरी ईद) हा सण अत्यंत उत्साही आणि भक्तीमय वातावरणात साजरा करण्यात आला. स्थानिक गांधीलीपुरा भागातील ऐतिहासिक ईदगाह मैदानावर हजारो मुस्लिम बांधवांनी एकत्र येत विशेष नमाज पठण केले. यावेळी देशामध्ये शांतता, समृद्धी आणि प्रगती नांदावी, यासाठी सामूहिक प्रार्थना (दुआ) करण्यात आली.
शहर ए काझी हाफिजो कारी अझर नुरी साहब यांच्या पवित्र नेतृत्वाखाली ईदची मुख्य नमाज पार पडली. या मंगलप्रसंगी शहरातील पोलीस प्रशासनातील वरिष्ठ अधिकारी आणि कर्मचाऱ्यांनी ईदगाह मैदानावर प्रत्यक्ष उपस्थित राहून सर्व मुस्लिम बांधवांना ईदच्या मनापासून शुभेच्छा दिल्या.
अमळनेरच्या संस्कृतीचे दर्शन
नमाज संपन्न झाल्यानंतर एक अत्यंत हृदयस्पर्शी दृश्य पाहायला मिळाले. मैदानाबाहेर उपस्थित हिंदू आणि मुस्लिम बांधवांनी एकमेकांना प्रेमाने आलिंगन देत ईदच्या शुभेच्छा दिल्या. अमळनेर शहराला लाभलेली सामाजिक सलोख्याची आणि एकतेची मोठी परंपरा या निमित्ताने पुन्हा एकदा अधोरेखित झाली. नमाजनंतर अनेक नागरिकांनी कब्रिस्तानात जाऊन आपल्या पूर्वजांच्या स्मृतींना उजाळा दिला आणि त्यांच्या आत्म्यासाठी प्रार्थना केली.
