अमळनेर (प्रतिनिधी) : अमळनेर तालुक्यातील निम शिवारात एका हिंस्र वन्यप्राण्याने तीन वर्षीय वासरावर हल्ला करून त्याला ठार केल्याची घटना उघडकीस आली आहे. अमळनेर येथील डॉ. संदीप जोशी यांच्या शेतात सुरू असलेल्या गोशाळेच्या आवारात ही घटना घडली.

डॉ. जोशी यांच्या मालकीचे शेत निम शिवारात असून, निम येथील शेतकरी सुदाम पाटील हे या शेतातील कामकाज पाहतात. घटनेच्या दुसऱ्या दिवशी सुदाम पाटील कामाच्या ठिकाणी आले असता त्यांना वासरू मृतावस्थेत आढळून आले. अज्ञात हिंस्र प्राण्याच्या हल्ल्यात वासराचा मृत्यू झाल्याचे लक्षात येताच त्यांनी तातडीने अमळनेर वनविभागाशी संपर्क साधून घटनेची माहिती दिली.

