मूडी गावात कानबाई उत्सवात सामाजिक बांधिलकी; शालेय विद्यार्थ्यांना क्रीडा साहित्याचे वाटप व वृक्षारोपण संपन्न

अमळनेर: मूडी प्र. अमळनेर (मूडी-दरेगाव ग्रुप ग्रामपंचायत) येथे कानबाई उत्सवाच्या उत्साहात गावकऱ्यांनी एकत्र येत सामाजिक बांधिलकीचा नवा आदर्श घालून दिला. येथील जिल्हा परिषद प्राथमिक शाळेतील विद्यार्थ्यांना मोफत क्रीडा साहित्य वाटप आणि गावात वृक्षारोपण असा दुहेरी उपक्रम उत्साहात पार पडला.

​स्व. केवळबाई संतोष पाटील यांच्या स्मरणार्थ त्यांचे ज्येष्ठ चिरंजीव दीपक संतोष पाटील (शिक्षक, कळवण) यांनी स्वखर्चाने शाळेतील विद्यार्थ्यांना विविध प्रकारच्या खेळ साहित्याचे मोफत वाटप केले. विद्यार्थ्यांच्या कलागुणांना वाव मिळावा व त्यांची क्रीडा आवड वाढावी, हा यामागील मुख्य उद्देश होता.

​याच कार्यक्रमात सयादेव फाउंडेशनच्या वतीने चंदू पाटील यांनी गावातील ज्येष्ठ नागरिकांच्या हस्ते वृक्षारोपण मोहीम राबवली. सयादेव फाउंडेशनतर्फे गेल्या वर्षभरापासून स्वखर्चाने वृक्षारोपण व शालेय साहित्य वाटपासारखे सामाजिक उपक्रम सातत्याने राबविले जात आहेत.

​कार्यक्रमास संतोष व्यंकट पाटील, युवराज व्यंकट पाटील, रमेश पाटील, ज्येष्ठ पत्रकार पांडुरंग नाना, आबा भिकन पाटील, अविनाश सौंदाणे, दिलीप पाटील, संदीप पाटील, अनिल पाटील, दिनेश पाटील, जितेंद्र पाटील, नत्थू शेलार, विजू पाटील, बंडू पाटील, नंदू पाटील, दगडू रामकृष्ण आणि पप्पू पोलिस यांच्यासह ग्रामस्थ उपस्थित होते. शाळेचे शिक्षक महाजन गुरुजी यांनी उपस्थितांचे आभार मानले. उत्सवाच्या काळात अशा उपक्रमांमुळे गावातून कौतुक होत आहे.