अमळनेर: प्रताप महाविद्यालय, अमळनेर येथे ४९ महाराष्ट्र बटालियन अमळनेरच्या वतीने आयोजित एन.सी.सी. संयुक्त वार्षिक प्रशिक्षण शिबिर (CATC-209) सध्या उत्साहात सुरू आहे. २० मे ते २९ मे २०२६ या कालावधीत आयोजित या शिबिराचा एक भाग म्हणून, दि. २६ मे २०२६ रोजी छात्र सैनिकांना अमळनेर नगरपरिषद अग्निशमन विभागातर्फे आग विझविण्याबाबतचे व आपत्कालीन परिस्थितीचे विशेष प्रशिक्षण देण्यात आले.
या संयुक्त शिबिरामध्ये धुळे (४८ महाराष्ट्र बटालियन), अमळनेर (४९ महाराष्ट्र बटालियन) आणि छत्रपती संभाजीनगर (५० महाराष्ट्र बटालियन) या तीन बटालियनमधील तब्बल ३५६ छात्र सैनिक सहभागी झाले आहेत.
आगीचे प्रकार आणि प्रात्यक्षिकांचे सादरीकरण
आजच्या काळात वाढत्या आगीच्या दुर्घटना पाहता, आगीवर नियंत्रण कसे मिळवावे याचे प्राथमिक ज्ञान सर्वांना असणे अत्यंत आवश्यक आहे. याच उद्देशाने अमळनेर नगरपरिषदेचे अग्निशमन अधिकारी श्री. गणेश गोसावी यांनी उपस्थितांना उत्कृष्ट मार्गदर्शन केले. त्यांनी छात्र सैनिकांना आगीचे विविध प्रकार, आग विझवण्याच्या पद्धती तसेच अग्निशमन साहित्यांची सविस्तर माहिती दिली.
