अमळनेर : “तथागत भगवान गौतम बुद्ध ही प्राचीन भारताची ओळख असून, अर्वाचीन भारताची ओळख डॉ. बाबासाहेब आंबेडकर आहेत. या महापुरुषांनी दिलेला धम्माचा मार्ग आणि शिकवण संपूर्ण मानवजातीच्या कल्याणासाठी आहे,” असे प्रतिपादन चोपडा येथील समाजकार्य महाविद्यालयाचे प्रा. डॉ. राहुल निकम यांनी केले.

      अमळनेर तालुक्यातील वाघोदा येथे भारतरत्न डॉ. बाबासाहेब आंबेडकर आणि तथागत भगवान गौतम बुद्ध यांच्या मूर्ती स्थापना सोहळ्याचे आयोजन करण्यात आले होते. याप्रसंगी प्रमुख वक्ते म्हणून ते बोलत होते.

मूर्तींची गावातून भव्य रॅली

    कार्यक्रमाची सुरुवात अतिशय उत्साहात झाली. प्रारंभी भगवान गौतम बुद्ध आणि डॉ. बाबासाहेब आंबेडकर यांच्या मूर्तींची फुलांच्या वर्षावात गावातून भव्य रॅली काढण्यात आली. यानंतर भंते नागसेन यांनी बुद्ध वंदना घेऊन मुख्य कार्यक्रमाची सुरुवात केली.

धम्म विचारांचे महत्त्व

     आपल्या मार्गदर्शनात डॉ. निकम पुढे म्हणाले की, “तथागतांच्या धम्माचे अनुसरण केल्यास मानवी जीवनाचे उत्थान होते. प्रज्ञा, शील आणि करुणा हे धम्माचे प्रमुख आधारस्तंभ आहेत, तर मैत्री, मुदिता, उपेक्षा आणि करुणा या धम्माच्या चार भिंती आहेत. मानवाने पंचशील आणि अष्टांग मार्गाचे पालन केल्यास तो स्वतःसह इतरांच्या जीवनातही सुख निर्माण करू शकतो.”

मान्यवरांची उपस्थिती

     या सोहळ्याचे आयोजन विनोड सैंदाणे, श्याम घोलप आणि समस्त ग्रामस्थांच्या सहकार्याने करण्यात आले होते. याप्रसंगी व्यासपीठावर खालील मान्यवर उपस्थित होते:

धम्म भंते नागसेन व भंते आनंद,अशोक बिराडे (सेवानिवृत्त गटशिक्षणाधिकारी),गौतम मोरे (सामाजिक कार्यकर्ते),प्रा. भगवान भालेराव, हृदयनाथ मोरे, एम. एस. बैसाणे,अतुल डोळस, प्रवीण बैसाणे, कृष्णकांत शिरसाठ, भालचंद्र सनर

     या सोहळ्याला वाघोदा परिसरातील नागरिक आणि उपासक मोठ्या संख्येने उपस्थित होते. कार्यक्रमाच्या यशस्वीतेसाठी आयोजकांनी व ग्रामस्थांनी विशेष परिश्रम घेतले.