मारवड प्राथमिक आरोग्य केंद्रात ‘जागतिक हिवताप दिन’ उत्साहात साजरा

 अमळनेर  : “हिवताप दुरीकरणसाठी कटिबद्ध: आता हे शक्य आहे आणि हे केलेच पाहिजे,” या घोषणेसह प्राथमिक आरोग्य केंद्र मारवड येथे जागतिक हिवताप दिन साजरा करण्यात आला. जिल्हा आणि तालुका आरोग्य प्रशासनाच्या मार्गदर्शनाखाली आयोजित या कार्यक्रमाद्वारे ग्रामस्थांमध्ये व्यापक जनजगृती करण्यात आली.

विविध उपक्रमांद्वारे जनजागृती

कार्यक्रमाच्या निमित्ताने मारवड गावातील विठ्ठल मंदिर परिसरात ‘पब्लिक ॲड्रेस सिस्टम’द्वारे हिवतापाविषयी माहिती देण्यात आली. आरोग्य कर्मचाऱ्यांनी घरोघरी जाऊन जनजागृतीपर स्टिकर्स लावले. ‘माझे गाव, आरोग्य संपन्न गाव’ ही संकल्पना राबवत ग्रामस्थांना स्वच्छतेचे महत्त्व पटवून देण्यात आले. तसेच गावात कंटेनर सर्वेक्षण करून तापाच्या रुग्णांचे रक्त नमुने संकलित करण्यात आले.

तज्ज्ञांचे मार्गदर्शन

कार्यक्रमाच्या अध्यक्षस्थानी वैद्यकीय अधिकारी डॉ. साहिल चौधरी होते. त्यांनी मलेरियाची लक्षणे आणि प्राथमिक उपचारांबाबत उपस्थितांना माहिती दिली. आरोग्य सहाय्यक जितेंद्र मोरे यांनी प्रतिबंधात्मक उपाय सांगताना मच्छरदाणीचा वापर, सांडपाण्याचा निचरा, शोषखड्डे तयार करणे आणि आठवड्यातून एक दिवस ‘कोरडा दिवस’ पाळण्याचे आवाहन केले. प्रयोगशाळा वैज्ञानिक अधिकारी के. आर. साबळे यांनी रक्त नमुने घेण्याबाबत आरोग्य कर्मचाऱ्यांना मार्गदर्शन केले.

ऐतिहासिक महत्त्वाची माहिती

योगेश कापडणे यांनी प्रास्ताविकात जागतिक हिवताप दिनाचा इतिहास सांगितला. २००७ च्या जागतिक आरोग्य परिषदेतील ठरावानुसार २००८ पासून हा दिवस जगभर साजरा केला जातो. भारताने २०३० पर्यंत हिवताप निर्मूलनाचे ध्येय ठेवले असून, महाराष्ट्रात १९५३ पासून यावर नियंत्रण मिळवण्यासाठी विशेष योजना राबवल्या जात असल्याचे त्यांनी नमूद केले.

सहभाग व आभार

या कार्यक्रमाला डॉ. नितीन मराठे, आरोग्य सहाय्यक जितेंद्र मोरे, के. आर. साबळे, योगेश कापडणे, ललिता तिडके, विद्या देवरे यांच्यासह आशा सेविका राजश्री पाटील व संगीता चौधरी उपस्थित होत्या. कार्यक्रमाचे सूत्रसंचालन योगेश कापडणे यांनी केले, तर आभार संगीता चौधरी यांनी मानले.