अमळनेर शहरातील मालमत्ताधारक आणि नागरिकांसाठी नगरपरिषदेने एक अत्यंत महत्त्वपूर्ण आणि दिलासादायक निर्णय घेतला आहे. मालमत्ता हस्तांतरण (फेरफार) शुल्कामध्ये मोठी कपात करण्याचा निर्णय नुकत्याच झालेल्या सर्वसाधारण सभेत घेण्यात आला असून, यामुळे सर्वसामान्यांचे आर्थिक ओझे हलके होणार आहे.
शहरातील लोकप्रतिनिधी आणि नागरिकांनी गेल्या अनेक दिवसांपासून या शुल्कात कपात करण्याची मागणी केली होती. या मागणीची दखल घेत नगराध्यक्ष डॉ. परीक्षित बाविस्कर यांच्या नेतृत्वाखाली नगरपरिषदेने हा ऐतिहासिक निर्णय घेतला आहे.
नवीन सुधारित दर:
मालमत्तेच्या खरेदी-विक्री व्यवहारांनंतर होणाऱ्या फेरफार प्रक्रियेसाठी शुल्काचे गणित आता बदलले आहे:
खरेदी व्यवहारावर आधारित हस्तांतरण: यापूर्वी खरेदी मूल्याच्या २% शुल्क आकारले जात होते. आता त्यात निम्मी कपात करण्यात आली असून, नागरिकांना केवळ १% शुल्क भरावे लागेल.
दस्ताऐवजाशिवाय हस्तांतरण (उदा. वारस नोंद): यासाठी आता १,५००/- रुपये इतका निश्चित दर ठरवण्यात आला आहे.
नगराध्यक्षांचे आवाहन
मालमत्तेची खरेदी-विक्री झाल्यानंतर नगरपरिषदेच्या दप्तरी कायदेशीर नोंद करणे अनिवार्य असते. मात्र, शुल्काचे दर जास्त असल्याने अनेक नागरिक ही नोंद करण्यास टाळाटाळ करत होते. आता हे दर कमी झाल्यामुळे नागरिकांनी या ‘सुवर्णसंधी’चा लाभ घ्यावा, असे आवाहन प्रशासनातर्फे करण्यात आले आहे.
”नागरिकांच्या हितासाठी आम्ही शुल्कात ५०% कपात केली आहे. ज्यांच्या मालमत्तांची वारस नोंद किंवा फेरफार अद्याप प्रलंबित आहे, त्यांनी तातडीने नगरपरिषदेच्या मालमत्ता कर विभागाशी संपर्क साधून आपली मालमत्ता कायदेशीरदृष्ट्या सुरक्षित करावी.”
— डॉ. परीक्षित बाविस्कर, नगराध्यक्ष, अमळनेर नगरपरिषद
