पुणेः अभियांत्रिकी अभ्यासक्रमात प्रवेश घेऊ ईच्छिणाऱ्या विद्यार्थ्यांसाठी महत्त्वाची ठरणारी संयुक्त प्रवेश परीक्षा जेईई-मेन २०२६ च्या पहिल्या सत्रासाठी नोंदणी प्रक्रिया सुरू झाली आहे. राष्ट्रीय परीक्षा एजन्सीने याबाबतची अधिसूचना प्रसिद्ध केली आहे. या अधिसूचनेनुसार विद्यार्थ्यांना ऑनलाइन अर्जनोंदणीसाठी २७ नोव्हेंबर पर्यंतची मुदत देण्यात आली असून, नोंदणी शनिवारपासून सुरू झाली आहे.
केंद्र सरकारच्या शिक्षण मंत्रालयाच्या उच्च शिक्षण विभागाने २०१९ पासून राष्ट्रीय परीक्षा एजन्सीकडे या परीक्षेच्या आयोजनाची जबाबदारी सोपवली आहे. जेईई मेन परीक्षेचे दोन पेपर घेतले जातात.पेपर १ अंतर्गत बी. ई. -बी.टेक. अभ्यासक्रमासाठी प्रवेश देण्यात येतो. या गुणांवरूनच राष्ट्रीय तंत्रज्ञान संस्था, भारतीय माहिती तंत्रज्ञान संस्था आणि इतर केंद्र पुरस्कृत तांत्रिक संस्थांमध्ये प्रवेश होतो. तसेच ही परीक्षा जेईईसाठी पात्रता ठरते, ज्यावर आधारित भारतीय तंत्रज्ञान संस्थांमध्ये प्रवेश दिला जातो. पेपर २ अंतर्गत देशभरातील बी.आर्क आणि बी. प्लॅनिंग अभ्यासक्रमासाठी प्रवेश प्रक्रिया राबवली जाते.
