अमळनेरच्या घंटा गाडी ठेकेदाराला काळया यादीत टाका — आम आदमी पार्टी आक्रमक!….. पीपीई किट, वर्षातून दोनदा बोनस, पीएफ आणि वेतनवाढीची मागणी; अन्यथा तीव्र आंदोलनाचा महेंद्र साळुंके यांचा इशारा

अमळनेर (प्रतिनिधी) : अमळनेर शहर स्वच्छ ठेवण्यासाठी अहोरात्र मेहनत घेणाऱ्या घंटागाडी चालक आणि स्वच्छता कर्मचाऱ्यांच्या आरोग्य, सुरक्षा आणि आर्थिक हक्कांचा प्रश्न ऐरणीवर आला आहे. या कर्मचाऱ्यांना आवश्यक सुरक्षा साहित्य, वर्षातून दोनदा बोनस, नियमित भविष्य निर्वाह निधी (PF), ईएसआयसी आणि सन्मानजनक वेतनवाढ मिळावी, तसेच घंटा गाडी ठेकेदाराला काळया यादीत टाका अशी आक्रमक मागणी आम आदमी पार्टीचे अमळनेर तालुकाध्यक्ष महेंद्र साळुंके यांनी प्रशासन व संबंधित कचरा संकलन कंत्राटदाराकडे केली आहे.

कचरा संकलनाचे काम करताना कर्मचाऱ्यांना ओला-सुका कचरा, काच, प्लास्टिक, दुर्गंधी आणि विविध जैविक घटकांचा सामना करावा लागतो. मात्र, अनेकदा आवश्यक सुरक्षा साधनांशिवाय त्यांना काम करावे लागत असल्याचा मुद्दा उपस्थित करत प्रत्येक कर्मचाऱ्याला हँडग्लोव्हज, मास्क, सेफ्टी बूट आणि सुरक्षा जॅकेटसह आवश्यक पीपीई किट उपलब्ध करून देण्याची मागणी करण्यात आली आहे.

महागाईच्या पार्श्वभूमीवर कर्मचाऱ्यांच्या वेतनात सन्मानजनक वाढ करावी, तसेच दिवाळी आणि गुढीपाडवा किंवा अन्य प्रमुख सणांच्या निमित्ताने वर्षातून दोनदा विशेष बोनस थेट त्यांच्या बँक खात्यात जमा करावा, अशीही मागणी निवेदनातून करण्यात आली आहे. याशिवाय प्रत्येक पात्र कर्मचाऱ्याचा पीएफ व ईएसआयसीचा लाभ नियमानुसार नियमित जमा होत आहे की नाही, याची प्रशासनाने तपासणी करावी आणि अनियमितता आढळल्यास संबंधितांवर कारवाई करावी, असे साळुंके यांनी म्हटले आहे.

कचरा संकलनाचे काम हे केवळ रोजगाराचे साधन नसून शहराच्या सार्वजनिक आरोग्याशी निगडित महत्त्वाची सेवा आहे. नागरिकांचा रोष, दुर्गंधी आणि प्रतिकूल परिस्थितीत काम करणाऱ्या या कर्मचाऱ्यांच्या मानसिक व शारीरिक कष्टांची समाजानेही दखल घ्यावी. शहर स्वच्छ ठेवणाऱ्या या स्वच्छतादूतांचा सार्वजनिक स्तरावर जाहीर सन्मान करण्यात यावा, अशी मागणीही आम आदमी पार्टीने केली आहे.

प्रशासन आणि कंत्राटदाराला आंदोलनाचा इशारा

शहर स्वच्छ ठेवणाऱ्या कर्मचाऱ्यांच्या घामाचे मोल ओळखून त्यांच्या मूलभूत हक्कांची अंमलबजावणी तातडीने करावी. सुरक्षा साहित्य, बोनस, वेतन आणि पीएफबाबत कोणतीही कुचराई करू नये. कर्मचाऱ्यांवरील अन्याय दूर न झाल्यास आम आदमी पार्टीच्या वतीने तीव्र आंदोलन छेडण्यात येईल, असा इशारा तालुकाध्यक्ष महेंद्र साळुंके यांनी दिला आहे.

Leave a Reply

Your email address will not be published. Required fields are marked *

error: Content is protected !!