सीएसआर निधीतून महिलांच्या सक्षमीकरणासाठी १/१८ हिस्सा द्या; अमळनेर येथे ‘व्हाईस ऑफ योजना दर्पण’ची प्रशासनाकडे मागणी

    अमळनेर : कंपन्यांच्या सामाजिक उत्तरदायित्व (सीएसआर) निधीतून महिलांच्या आर्थिक व सामाजिक विकासासाठी १/१८ हिस्सा राखीव ठेवण्यात यावा, अशी आग्रही मागणी ‘व्हाईस ऑफ योजना दर्पण असोसिएशन’तर्फे अमळनेर पंचायत समितीच्या गटविकास अधिकाऱ्यांकडे निवेदनाद्वारे करण्यात आली आहे.

अमळनेर येथील सामाजिक कार्यकर्त्या अनिता बापू भालेराव यांच्या नेतृत्वाखाली प्रशासनाला हे निवेदन सादर करण्यात आले. या निवेदनात म्हटले आहे की, कंपनी कायदा २०१३ मधील कलम १३५ नुसार पात्र कंपन्यांना त्यांच्या सरासरी निव्वळ नफ्यातील दोन टक्के रक्कम सामाजिक कार्यासाठी खर्च करणे बंधनकारक आहे. कायद्याच्या अनुसूची ७ मध्ये महिला सक्षमीकरणाचा स्पष्ट समावेश करण्यात आलेला आहे.

त्यामुळे सीएसआर निधीतील प्रत्येक अठरा रुपयांमागे किमान एक रुपया महिलांच्या सर्वांगीण विकासासाठी खर्च करण्यात यावा, जेणेकरून महिलांना आवश्यक आर्थिक पाठबळ मिळू शकेल, असे या निवेदनात नमूद करण्यात आले आहे.

या मागणीचे निवेदन अमळनेरचे गटविकास अधिकारी यांच्यासह उपविभागीय अधिकारी (प्रांत), तहसीलदार तसेच नगरपरिषदेचे मुख्याधिकारी यांनाही माहिती व पुढील कार्यवाहीसाठी सादर करण्यात आले आहे. निवेदनावर अनिता भालेराव यांच्यासह शकुंतला सोनवणे व इतर महिला पदाधिकाऱ्यांच्या स्वाक्षऱ्या आहेत.

Leave a Reply

Your email address will not be published. Required fields are marked *

error: Content is protected !!