नगाव खुर्दमध्ये रेशन वितरणाचा गोंधळ!…..लाभार्थ्यांचे अंगठे घेतले, मात्र धान्य मिळाले नसल्याची तक्रार; दुकानाचा परवाना रद्द करण्याची ग्रामस्थांची मागणी 

      अमळनेर ,नगाव खुर्द येथे रेशन दुकान क्रमांक १५२ मध्ये सप्टेंबर २०२६ चे धान्य वितरित न करताच लाभार्थ्यांचे अंगठे घेतल्याचा गंभीर आरोप करण्यात आला आहे. या प्रकरणी सरपंचांनी अमळनेरचे प्रांताधिकारी मयूर भंगाळे यांच्याकडे तक्रार केल्यानंतर पुरवठा विभागाच्या अधिकारी रुकसाना शेख यांनी घटनास्थळी जाऊन पंचनामा करून अमळनेर तहसीलदार यांना अहवाल दिला.

अंगठे घेतले, गोदामात धान्याची पोती!

      चौकशीदरम्यान लाभार्थ्यांनी सप्टेंबर महिन्याचे धान्य मिळाले नसल्याचे सांगितले. दुसरीकडे, रेशन गोदामात धान्याची पोती आढळल्याची माहिती समोर आली आहे. त्यामुळे लाभार्थ्यांचे अंगठे घेतल्यानंतर धान्याचे प्रत्यक्ष वितरण झाले होते का, धान्याचा साठा गोदामात कसा राहिला आणि वितरणाच्या नोंदी कशा करण्यात आल्या, असे प्रश्न निर्माण झाले आहेत.

दुकानदाराच्या अनुपस्थितीत चौकशी; संगनमताचा आरोप

    या चौकशीवेळी संबंधित रेशन दुकानदार स्वतः उपस्थित नसून त्यांच्या वतीने पती प्रवीण गोसावी उपस्थित होते. तर तक्रारदार घटनास्थळी उपस्थित होते. दरम्यान, पुरवठा अधिकारी आणि रेशन दुकानदार यांच्यात संगनमत असल्याचा आरोप ग्रामस्थांनी केला असून संबंधितांवर कारवाईची मागणी केली आहे. मात्र, या आरोपांची अधिकृत पुष्टी झालेली नाही.

पोलिस बंदोबस्तात पुढील कारवाई

पंचनामा व चौकशीची प्रक्रिया पूर्ण करून पुरवठा अधिकारी रुकसाना शेख यांनी आपला अहवाल पुढील कायदेशीर कारवाई करण्यासाठी तहसीलदार यांना देण्यात आला. यावेळी पोलिस बंदोबस्तही ठेवण्यात आला होता.

आता या प्रकरणातील पंचनाम्याचा निष्कर्ष काय, लाभार्थ्यांना धान्य मिळाले नसल्याच्या तक्रारीत तथ्य आढळते का आणि दोषींवर कोणती कारवाई होणार, याकडे नगाव खुर्दच्या ग्रामस्थांचे लक्ष लागले आहे. रेशन वितरणातील पारदर्शकता आणि लाभार्थ्यांच्या हक्काच्या धान्याबाबत प्रशासन काय भूमिका घेते, हे पाहणे महत्त्वाचे ठरणार आहे.

Leave a Reply

Your email address will not be published. Required fields are marked *

error: Content is protected !!