​अमळनेर: दुधाची प्रत (फॅट) कृत्रिमरीत्या वाढवून नागरिकांच्या आरोग्याशी खेळणाऱ्या एका बनावट दूध निर्मिती अड्ड्यावर अन्न व औषध प्रशासन (FDA) आणि अमळनेर पोलिसांनी संयुक्त कारवाई करत मोठा पर्दाफाश केला आहे. जानवे-इंदपिंप्री रस्त्यावरील पत्री शेडमध्ये सुरू असलेल्या या कारखान्यातून महेश दिलीप पाटील (वय २७) याला रंगेहात अटक करण्यात आली आहे.

​कारवाईचा तपशील

​गुप्त माहितीच्या आधारे पोलीस निरीक्षक दत्तात्रय निकम यांनी जळगाव अन्न व औषध प्रशासनाचे अधिकारी आकाश बोराडे यांच्याशी संपर्क साधून संयुक्त पथक तयार केले. ३० ऑगस्ट रोजी दुपारी साडेतीनच्या सुमारास पथकाने जानवे-इंदपिंप्री रस्त्यावरील संशयित पत्री शेडवर अचानक छापा टाकला.

​छापा टाकला तेव्हा आरोपी मिक्सरच्या मदतीने रासायनिक व तेलयुक्त घटकांपासून बनावट दूध तयार करत होता. तपासात आरोपीने सांगितले की:१० लिटर कृत्रिम भेसळयुक्त द्रव तयार करून ते १०० लिटर अस्सल गायीच्या दुधात मिसळले जात होते.यामुळे दुधाचा फॅट वाढवून हे दूध पुढील विक्रीसाठी धुळे येथे पाठवले जायचे.

​जप्त साहित्य व दाखल गुन्हे

​कारवाईदरम्यान पथकाने घटनास्थळावरून मिक्सर, सोयाबीन तेल, लोखंडी कॅन, गायीचे दूध व इतर भेसळीचे साहित्य जप्त केले.
​अधिकारी आकाश बोराडे यांच्या फिर्यादीवरून आरोपीविरुद्ध अन्न सुरक्षा व मानके कायदा २००६ (कलम २६(१), २७(३), ३१(१), ३१(२), ५९) तसेच भारतीय न्याय संहिता (BNS) (कलम २७४, २७५, १२३, ३१८) अंतर्गत गुन्हा नोंदवून त्याला अटक करण्यात आली आहे. या प्रकरणाचा पुढील तपास हेडकॉन्स्टेबल सुनील जाधव करत आहेत.