अमळनेर : मुंदडा ग्लोबल हायस्कूल समोरील भाग ते ओम हाईट्स (गुलमोहर कॉलनी) च्या मागील बाजूने जाणाऱ्या सांडपाणी नाल्याचे बांधकाम नगरपालिकेकडून सुरू आहे. मात्र, या कामात निविदेतील अटी व नियमांचे उल्लंघन करून नाल्याचा मूळ आकार, रुंदी व प्रवाहात बेकायदेशीर फेरफार केला जात असल्याचा गंभीर आरोप अखिल भारतीय सफाई मजदूर काँग्रेसचे महाराष्ट्र प्रदेश कार्यकारणी सदस्य रघुनाथ रामभाऊ मोरे यांनी केला आहे.
याबाबत त्यांनी अमळनेर नगरपरिषदेच्या मुख्याधिकाऱ्यांना तातडीने निवेदन सादर केले आहे. सर्वोच्च न्यायालयाच्या विविध आदेशांनुसार नैसर्गिक जलस्रोत व नाल्यांच्या प्रवाहात फेरफार करण्यास बंदी आहे. असे असतानाही संबंधित ठेकेदाराने निकृष्ट दर्जाचे काम केले असून नाल्याचा नैसर्गिक प्रवाह रोखला आहे. यामुळे पावसाळ्यात परिसरात पाणी साचून जीवित व वित्तहानी होण्याची, तसेच डास व आजारपण वाढण्याची शक्यता निर्माण झाली आहे.
प्रमुख मागण्या:
नाल्याच्या निकृष्ट बांधकामाची निष्पक्ष व तटस्थ चौकशी करण्यात यावी.
पिंपळे रोड येथील रमाई आंबेडकर नगर व म्हाडा कॉलनीलगतच्या नाल्यावर दलित विकास निधीतून प्रताप व्यायामशाळेपर्यंत संरक्षक भिंत व कठडे उभारावेत.
पावसाळ्यापूर्वी नाल्याची योग्य प्रकारे सफाई करून दीर्घकालीन उपाययोजना कराव्यात.
