अमळनेर : शिक्षण व्यवस्थेत दिवसेंदिवस वाढत चाललेल्या अनागोंदीचा तीव्र निषेध नोंदवण्यासाठी, विद्यार्थ्यांच्या न्याय्य हक्कांचे संरक्षण करण्यासाठी तसेच पारदर्शक व भ्रष्टाचारमुक्त शिक्षण व्यवस्था निर्माण व्हावी, या प्रमुख मागण्यांसाठी ‘राष्ट्रीय विद्यार्थी संघ’ (NSUI), अमळनेर यांच्या वतीने शहरात भव्य कॅण्डल मार्चचे आयोजन करण्यात आले होते.
सदर कॅण्डल मार्च रॅलीची सुरुवात स्थानिक बळीराजा स्मारक येथून झाली. हातात मेणबत्त्या आणि न्यायाच्या मागण्यांचे फलक घेऊन निघालेली ही रॅली छत्रपती शिवाजी महाराज पुतळा चौकात पोहोचल्यानंतर तिच्यी सांगता झाली. या रॅलीमध्ये केवळ विद्यार्थीच नव्हे, तर शिक्षक, प्राध्यापक, पालक, विविध सामाजिक संघटनांचे पदाधिकारी, कार्यकर्ते आणि संविधानप्रेमी नागरिकांनी मोठ्या संख्येने उपस्थित राहून विद्यार्थ्यांवर होणाऱ्या अन्यायाविरोधात आपली खंबीर एकजूट दाखवून दिली.
विद्यार्थ्यांच्या भविष्यासाठी बुलंद आवाज
हा कॅण्डल मार्च केवळ एक निषेध मोर्चा नसून विद्यार्थ्यांच्या उज्ज्वल भविष्याच्या संरक्षणासाठी, गुणवत्तापूर्ण शिक्षणासाठी आणि न्यायासाठी उठवलेला बुलंद आवाज होता. “विद्यार्थ्यांच्या भविष्याशी आणि शैक्षणिक हक्कांशी खेळणारा कोणताही अन्याय किंवा भ्रष्टाचार अजिबात सहन केला जाणार नाही,” असा स्पष्ट इशारा या प्रसंगी आंदोलकांनी दिला.
मान्यवरांची प्रमुख उपस्थिती
या जनआंदोलनाला पाठिंबा देण्यासाठी राजकीय, सामाजिक व शैक्षणिक क्षेत्रातील अनेक दिग्गज उपस्थित होते. यात प्रमुख उपस्थितीमध्ये:
माजी आमदार बी. एस. पाटील, उपनगराध्यक्ष प्रशांत निकम, NSUI जिल्हाध्यक्ष ॲड. कौस्तुभ पाटील, धनगर दला पाटील, गोकुळ बोरसे, सुलोचना वाघ, दिनेश पवार, मगन भाऊसाहेब पाटील, कैलास पाटील, गिरीश पाटील.
रज्जाक शेख, सईद तेली, मनोहर निकम, अशोक पवार, लीलाधर पाटील, प्रताप पाटील, रोहिदास दाजी पाटील, जयेश पाटील, नरेंद्र चव्हाण, सृजन संदानशिव, उमेश संदानशिव, प्रवीण पाटील यांसह तालुक्यातील इतर प्रमुख मान्यवर व नागरिक मोठ्या संख्येने सहभागी झाले होते.
मौन पाळून वाहिली आदरांजली
कार्यक्रमाच्या शेवटी, शिक्षण व्यवस्थेतील त्रुटींमुळे व अन्यायामुळे बाधित झालेल्या विद्यार्थ्यांना श्रद्धांजली अर्पण करण्यात आली. उपस्थितांनी काही वेळ शांत राहून मौन पाळले आणि पीडित विद्यार्थ्यांच्या उज्ज्वल भविष्यासाठी व त्यांना त्वरित न्याय मिळावा यासाठी आदरांजली वाहिली.
“विद्यार्थ्यांच्या न्याय्य हक्कांचा आणि भविष्याचा हा संघर्ष असाच सुरू राहील; जोपर्यंत पारदर्शक शिक्षण व्यवस्था निर्माण होत नाही, तोपर्यंत हा लढा थांबणार नाही!”
— NSUI, अमळनेर
