अडावद (विशेष प्रतिनिधी): चोपडा तालुक्यातील माचला येथे किरकोळ कारणावरून एका ६५ वर्षीय वृद्धेला आणि तिच्या कुटुंबाला जातीवाचक शिवीगाळ करत, घरात डांबून मारण्याची व गावाबाहिर हाकलण्याची धमकी दिल्याचा धक्कादायक प्रकार समोर आला आहे. याप्रकरणी पीडित वृद्धेच्या तक्रारीवरून अडावद पोलीस ठाण्यात एकाच कुटुंबातील आणि गल्लीतील ५ संशयितांविरुद्ध ॲट्रॉसिटीसह विविध कलमांखाली गुन्हा दाखल करण्यात आला आहे.
मिळालेल्या माहितीनुसार, माचला येथील रहिवासी कमलबाई लक्ष्मण अहिरे (वय ६५) या त्यांचा लहान मुलगा विकास याच्यासह राहतात. त्यांच्या घराशेजारीच संतोष एकनाथ पाटील आणि शिवा एकनाथ पाटील हे आपल्या परिवारासह राहतात. घराच्या मागील जागेच्या कारणावरून त्यांच्यात वाद सुरू होता.
अक्षेपार्ह कृत्याला हटकल्याचा राग
गत १९ एप्रिल २०२६ रोजी आखाजी सणाच्या दिवशी कमलबाई आपल्या घरात जेवण करत असताना, संशयित भोल्या शिवा पाटील हा खिडकीतून थुंकत होता. त्याला जेवताना थुंकू नको असे म्हटले असता, त्याने उद्धटपणे उत्तर दिले. तसेच इतर संशयितांनी बाहेर येत वृद्धेवर दबाव टाकण्याचा प्रयत्न केला. मात्र, सण असल्याने कमलबाई यांनी त्या दिवशी पोलिसांत तक्रार केली नाही.
