अमळनेर : देशाच्या संसदेतील उत्कृष्ट कामगिरीबद्दल दिला जाणारा अत्यंत प्रतिष्ठित आणि मानाचा ‘संसद रत्न पुरस्कार २०२६’ जळगाव लोकसभा मतदारसंघाच्या खासदार स्मिता वाघ यांना जाहीर झाला आहे. विशेष म्हणजे, हा सर्वोच्च बहुमान त्यांना सलग दुसऱ्यांदा प्राप्त झाला असून, जळगाव जिल्ह्याच्या शिरपेचात मानाचा तुरा रोवला गेला आहे. त्यांच्या या यशामुळे संपूर्ण जिल्ह्यातून आणि राजकीय स्तरातून त्यांच्यावर अभिनंदनाचा वर्षाव होत आहे.
संसद रत्न पुरस्कार समितीच्या अध्यक्षा प्रियंदर्शिनी राहुल यांनी या पुरस्कारांची अधिकृत घोषणा केली. २०२६ च्या अर्थसंकल्पीय अधिवेशनापर्यंतच्या संसदेतील कामगिरीचा सखोल आढावा घेऊन, तज्ज्ञ ज्युरी समितीने या वर्षाच्या पुरस्कार विजेत्यांची निवड केली आहे.
जिद्द आणि कर्तव्यभावनेचा सर्वोच्च गौरव
खासदार स्मिता वाघ यांच्या कार्यनिष्ठेचे देशभरातून विशेष कौतुक केले जात आहे. सध्या त्या अत्यंत कठीण अशा कर्करोगाच्या (कॅन्सर) आजाराशी झुंज देत आहेत. केमोथेरपीचे अत्यंत त्रासदायक उपचार सुरू असतानाही, त्यांनी आपल्या कर्तव्यात यत्किंचितही कसूर पडू दिली नाही. या शारीरिक व्याधीवर मात करत त्यांनी संसदेच्या अधिवेशनाला नियमित उपस्थिती लावली आणि जनतेचे प्रश्न प्रभावीपणे मांडले. त्यांच्या याच अफाट जिद्दीचा, कर्तव्यभावनेचा आणि लोकसेवेप्रती असलेल्या समर्पणाचा सन्मान या पुरस्काराच्या रूपाने झाला आहे.
या निकषांवर झाली निवड:
संसदीय कामकाजातील सक्रिय सहभाग: संसदेच्या सभागृहात विविध विषयांवर अभ्यासपूर्ण मते मांडणे.
लोकहिताच्या प्रश्नांचा पाठपुरावा: मतदारसंघातील आणि देशातील जनसामान्यांच्या प्रश्नांवर सातत्यपूर्ण आवाज उठवणे.
शिस्तबद्ध उपस्थिती: आजारपणाचे मोठे संकट असतानाही संसदेच्या अधिवेशनात नियमित उपस्थित राहणे.
संसद रत्न पुरस्कारात महाराष्ट्राचा डंका!
यंदाच्या ‘संसद रत्न’ पुरस्कारांमध्ये महाराष्ट्राचे विशेष वर्चस्व पाहायला मिळाले आहे. देशातील आघाडीच्या खासदारांमध्ये महाराष्ट्रातील एकूण ५ खासदारांना हा पुरस्कार जाहीर झाला आहे. यामध्ये:
१. स्मिता वाघ (लोकसभा, जळगाव)
२. श्रीकांत शिंदे (लोकसभा)
३. नरेश म्हस्के (लोकसभा)
४. हेमंत सावरा (लोकसभा)
५. मेधा कुलकर्णी (राज्यसभा)
