अमळनेर : शहरासह परिसरात अवैध मद्यविक्रीने अक्षरशः उच्छाद मांडला असून, दारूशिवाय धंदाच नाही अशी परिस्थिती निर्माण झाली आहे. ज्या हॉटेल्स, ढाबे आणि फॅमिली रेस्टॉरंट्सकडे मद्यविक्री अथवा मद्यप्राशनाचा कोणताही अधिकृत परवाना नाही, त्या ठिकाणी सर्रासपणे बियर, विदेशी मद्य आणि देशी दारू उपलब्ध होत असल्याने राज्य उत्पादन शुल्क विभागाच्या कार्यपद्धतीवर गंभीर प्रश्नचिन्ह उपस्थित होत आहे.
शहरातील मुख्य रस्ते, धुळे रोड परिसर आणि शहरातील मध्यवर्ती भागातील अनेक हॉटेल्समध्ये रात्री उशिरापर्यंत मद्यपींचे ‘दरबार’ भरत असल्याचे चित्र आहे. नियम धाब्यावर बसवत काही हॉटेल चालक काउंटरखालून मद्य पुरवत असल्याची चर्चा उघडपणे सुरू आहे. परवानाधारक बारप्रमाणे वातावरण तयार करून ग्राहकांना ‘स्पेशल सेवा’ दिली जात असल्याचेही सांगितले जात आहे.
