अमळनेर : ऑनलाइन फार्मसीच्या माध्यमातून होत असलेल्या बेकायदेशीर औषध विक्रीवर तातडीने बंदी घालावी आणि केंद्र सरकारने कोविड काळात लागू केलेला GSR220(E) आदेश मागे घ्यावा, या प्रमुख मागण्यांसाठी अमळनेर तालुका औषध विक्रेता संघाने बुधवारी (दि. २०) एक दिवसाचा कडकडीत बंद पाळला.
या आंदोलनांतर्गत तालुक्यातील औषध विक्रेत्यांनी सकाळी विजय मारुती मंदिरापासून तहसील कार्यालयापर्यंत निषेध मोर्चा काढला. ऑनलाइन फार्मसीमुळे डॉक्टरांच्या प्रिस्क्रिप्शनशिवाय बंदी असलेली औषधेही सहज उपलब्ध होत असून, यामुळे नागरिकांच्या आरोग्याशी खेळ सुरू असल्याचा गंभीर आरोप संघटनेने केला आहे. मोर्च्यानंतर तहसीलदार रूपेशकुमार सुराणा यांना मागण्यांचे निवेदन देण्यात आले.
