अमळनेर : शहरातील रेल्वे लाईन लगत असलेल्या विप्रो कंपनीच्या बाजूला आज दुपारी दोन वाजेच्या सुमारास दोन ठिकाणी भीषण आग लागल्याची घटना घडली. ही आग विप्रो प्लांटच्या अगदी जवळ असल्याने मोठी दुर्घटना घडण्याची शक्यता निर्माण झाली होती. मात्र, अग्निशमन दल आणि विप्रोच्या कर्मचाऱ्यांनी दाखवलेल्या तत्परतेमुळे आग आटोक्यात आली आणि मोठा अनर्थ टळला.
नेमकी घटना काय?
दुपारी २ वाजेच्या सुमारास रेल्वे लाईनच्या कडेला असलेल्या परिसरात अचानक आग लागली. वाऱ्यामुळे आगीने रौद्र रूप धारण केले आणि ती विप्रो कंपनीच्या प्लांटच्या दिशेने सरकू लागली. आगीचे स्वरूप पाहून परिसरात एकच खळबळ उडाली होती. घटनेची माहिती मिळताच अमळनेर नगरपालिकेच्या अग्निशमन दलाने तात्काळ घटनास्थळी धाव घेतली.
संयुक्त मोहिमेला यश
अग्निशमन दलाचे जवान आणि विप्रो कंपनीच्या सुरक्षा व तांत्रिक कर्मचाऱ्यांनी एकत्रितपणे पाण्याचा मारा करून आग विझवण्याचे शर्थीचे प्रयत्न केले. दोन्ही ठिकाणची आग पूर्णपणे नियंत्रणात आणल्याने कंपनीच्या मालमत्तेचे आणि परिसराचे मोठे नुकसान टळले आहे.
या पथकाने बजावली कामगिरी
अग्निशमन अधिकारी श्री. गणेश गोसावी यांच्या मार्गदर्शनाखाली या मोहिमेत खालील कर्मचाऱ्यांनी मोलाची भूमिका बजावली: फारुक शेख दिनेश बिऱ्हाडे सत्येन संदानशिव वसीम पठाण मच्छिंद्र चौधरी भिका संदानशिव आनंद झिम्बल आकाश संदानशिव आकाश बाविस्कर
आगीचे नेमके कारण अद्याप स्पष्ट झाले नसले तरी, रेल्वे लाईन लगत असलेल्या सुक्या कचऱ्यामुळे किंवा शॉर्ट सर्किटमुळे ही आग लागली असावी, असा प्राथमिक अंदाज वर्तवण्यात येत आहे. अग्निशमन दलाच्या या कामगिरीचे परिसरात कौतुक होत आहे.
