अमळनेरच्या ‘किंग ऑफ किंग’ ग्रुपतर्फे सप्तशृंगी गडावर जाणाऱ्या ३ हजार भाविकांना फराळ वाटप गेल्या १७ वर्षांपासून अविरत सेवा; जिलेबी, खिचडी आणि पाण्याचे वाटप

    अमळनेर : चैत्रोत्सवाच्या निमित्ताने सप्तशृंगी गडावर दर्शनासाठी जाणाऱ्या हजारो भाविकांची सेवा करण्यासाठी अमळनेर येथील ‘किंग ऑफ किंग’ ग्रुप सरसावला आहे. या ग्रुपच्या वतीने सलग १७ व्या वर्षी गडावर जाणाऱ्या जवळपास ३ हजार भाविकांना साबुदाणा खिचडी, जिलेबी आणि अल्पोपहाराचे वाटप करण्यात आले.

सकाळपासून रात्रीपर्यंत अविरत सेवा:

    सप्तशृंगी देवीच्या चरणी नतमस्तक होण्यासाठी जाणाऱ्या पदयात्री आणि भाविकांची गैरसोय होऊ नये, या उद्देशाने सकाळी ८ वाजेपासून ते रात्री ८ वाजेपर्यंत हे सेवाकार्य सुरू होते. यामध्ये भाविकांना उपवासाची साबुदाणा खिचडी, गरमागरम जिलेबी, बिस्किटे, चॉकलेट्स आणि पिण्याच्या पाण्याच्या बॉटलचे वाटप करण्यात आले.

या कार्यकर्त्यांचा पुढाकार:

      हे सेवाकार्य यशस्वी करण्यासाठी किंग ऑफ किंग ग्रुपचे भावेश जैन, गौरव पाटील, गणेश गुरव, अक्षय चव्हाण, चेतन पाटील, रोशन वर्मा, राज लाड, शुभम बोरसे व इतर सदस्यांनी परिश्रम घेतले. विशेष म्हणजे, सामाजिक बांधिलकी जपत हा ग्रुप गेल्या १७ वर्षांपासून हा उपक्रम अतिशय श्रद्धेने आणि शिस्तबद्ध पद्धतीने राबवत असल्याचे आयोजकांनी सांगितले.

      गडावर जाणाऱ्या भाविकांनी या तृप्त करणाऱ्या फराळाचा आस्वाद घेत अमळनेरच्या या तरुण कार्यकर्त्यांच्या उपक्रमाचे भरभरून कौतुक केले.