लाच देऊ नका, लाच घेऊ नका! अमळनेरमध्ये लाचलुचपत प्रतिबंधक विभागाची जनजागृती…….शासकीय कार्यालयांमध्ये पोस्टरद्वारे भ्रष्टाचारविरोधी संदेश; नागरिकांना लाचखोरीविरोधात पुढाकार घेण्याचे आवाहन

अमळनेर (प्रतिनिधी) : भ्रष्टाचाराला आळा घालण्यासाठी आणि नागरिकांमध्ये लाचखोरीविरोधी जनजागृती निर्माण करण्याच्या उद्देशाने लाचलुचपत प्रतिबंधक विभाग, जळगाव यांच्यामार्फत जनजागृती मोहीम राबविण्यात येत आहे. या मोहिमेअंतर्गत अमळनेर तालुक्यातील विविध शासकीय आस्थापनांच्या परिसरात जनजागृतीपर पोस्टर लावण्यात आले.

“भ्रष्टाचाराला नाही म्हणा”, “लाच देऊ नका, लाच घेऊ नका” आणि “लाचेशिवाय कोणताही शासकीय दाखला मिळणे हा तुमचा हक्क आहे” अशा संदेशांद्वारे नागरिकांना भ्रष्टाचाराविरोधात जागरूक करण्यात येत आहे. शासकीय कामांसाठी कोणी लाचेची मागणी केल्यास संबंधित विभागाकडे तक्रार करण्याचे आवाहनही या माध्यमातून करण्यात आले आहे.

या जनजागृती उपक्रमात लाचलुचपत प्रतिबंधक विभाग, जळगावचे उपअधीक्षक योगेश ठाकूर, पोलीस निरीक्षक रेश्मा अवतारे, पोलीस उपनिरीक्षक सुरेश पाटील, पोलीस कर्मचारी बाळू मराठे आणि मनोज पाटील आदी सहभागी झाले होते.

लाचेची मागणी झाल्यास नागरिकांनी लाचलुचपत प्रतिबंधक विभागाच्या टोल फ्री क्रमांक १०६४ वर संपर्क साधावा. तसेच ७५८८६६१०६४ या क्रमांकावरही संपर्क साधता येईल, असे आवाहन विभागाच्या जनजागृती संदेशातून करण्यात आले आहे.

शासकीय कामकाजात पारदर्शकता वाढविणे, नागरिकांचे लाचखोरीपासून संरक्षण करणे आणि भ्रष्टाचारमुक्त प्रशासनासाठी जनसहभाग वाढविणे, हा या मोहिमेचा मुख्य उद्देश आहे.

Leave a Reply

Your email address will not be published. Required fields are marked *

error: Content is protected !!