अमळनेरच्या कचरा व्यवस्थापनावर संताप! ठेकेदाराचा ठेका रद्द करा; अन्यथा आंदोलन……. दरमहा ₹२५ लाख खर्च, तरीही कचऱ्याचे ढीग; सात दिवसांत कारवाईची मागणी

अमळनेर (प्रतिनिधी) : अमळनेर शहरात कचरा संकलनातील कथित अनियमितता, वेळेवर कचरा न उचलणे आणि काही ठिकाणी कचरा जाळण्याच्या प्रकारांवरून नगर परिषद प्रशासनाच्या कार्यपद्धतीवर प्रश्नचिन्ह उपस्थित करण्यात आले आहे. संबंधित ठेकेदाराचा ठेका रद्द करून कचरा व्यवस्थापन थेट नगर परिषदेने हाताळावे, अशी मागणी अमळनेर शहर स्वच्छता व नागरी हक्क मोहिमेच्या वतीने करण्यात आली आहे.

शहराच्या कचरा व्यवस्थापनावर दरमहा अंदाजे ₹२० ते २५ लाख खर्च होत असल्याचा दावा निवेदनात करण्यात आला आहे. तरीही अनेक भागांत कचरा वेळेवर उचलला जात नसल्याने दुर्गंधी, अस्वच्छता आणि आरोग्याचा प्रश्न निर्माण होत असल्याचे म्हटले आहे.

ठेकेदाराला दंड करा, जीपीएस अनिवार्य करा!

कामातील त्रुटींची चौकशी करून दोषी आढळल्यास ठेकेदारावर दंडात्मक कारवाई करावी, तसेच वाहनांना जीपीएस प्रणाली बसवून कचरा संकलनावर नियंत्रण ठेवावे, अशी मागणी करण्यात आली आहे. ठेकेदारीऐवजी नगर परिषदेने स्वतः व्यवस्था चालविल्यास खर्चात बचत होईल का, याचाही तुलनात्मक अभ्यास करण्याची मागणी निवेदनात आहे.

मुख्याधिकाऱ्यांना सात दिवसांची मुदत देण्यात आली असून, या कालावधीत योग्य कारवाई न झाल्यास नागरिकांना सोबत घेऊन लोकशाही मार्गाने आंदोलन छेडण्याचा इशारा देण्यात आला आहे. निवेदनाच्या प्रती जिल्हाधिकारी, जळगाव आणि नगरविकास मंत्र्यांनाही पाठविण्यात आल्या आहेत.

“करदात्यांचा पैसा शहराच्या विकासासाठीच वापरा,” अशी ठाम भूमिका मोहिमेच्या निवेदनातून मांडण्यात आली आहे.

Leave a Reply

Your email address will not be published. Required fields are marked *

error: Content is protected !!