तालुक्याचा खासदार असल्याचा अमळनेरकरांना मोठा फायदा : आमदार अनिल पाटील ‘प्रगतिशील महाराष्ट्र २०२६’ प्रदर्शनाची सांगता; साडेबारा हजार नागरिकांची भेट, उत्कृष्ट स्टॉल्सचा गौरव

     अमळनेर : आपल्या तालुक्याचा खासदार असल्यावर काय फायदा होतो, हे खासदार स्मिताताई वाघ यांनी केंद्र सरकारच्या विविध विभागांचे भव्य प्रदर्शन अमळनेर मध्ये भरवून दाखवून दिले आहे. कृषी, अणुऊर्जा, संरक्षण, आयआयटी अशा महत्त्वाच्या विभागांची माहिती ग्रामीण भागातील मुलांपर्यंत पोहोचल्याने नागरिक समाधानी आहेत, असे गौरवोद्गार आमदार अनिल पाटील यांनी काढले.

       खासदार स्मिताताई वाघ यांच्या पुढाकाराने आणि दिल्लीच्या फ्रेंड्स एक्झिबिशन अँड प्रमोशनच्या वतीने कलागुरू मंगल कार्यालयात आयोजित तीन दिवसीय ‘प्रगतिशील महाराष्ट्र २०२६’ प्रदर्शनाचा समारोप शुक्रवारी पारितोषिक वितरणाने झाला. या वेळी पारोळा-एरंडोलचे आमदार अमोल पाटील, भाजप प्रदेश सचिव भैरवीताई वाघ-पलांडे, माजी सभापती दिनकर पाटील, डॉ. अनिल शिंदे, डी. जी. पाटील, एरंडोलचे नगराध्यक्ष नरेंद्र ठाकूर यांच्यासह स्थानिक पदाधिकारी व मान्यवर उपस्थित होते.

       या वेळी बोलताना खा. स्मिताताई वाघ यांनी सांगितले की, केंद्रीय स्तरावरील अधिकाऱ्यांना तालुक्याच्या ठिकाणी आणणे आव्हानात्मक होते, मात्र गेल्या चार महिन्यांच्या प्रयत्नांमुळे हे शक्य झाले. तीन दिवसांत साडेबारा हजारांहून अधिक विद्यार्थी, शेतकरी आणि नागरिकांनी प्रदर्शनाला भेट दिली. आमदार अमोल पाटील यांनीही, रस्ते-गटारीं पलीकडे जाऊन शासनाचे व्यापक उपक्रम जनतेपर्यंत पोहोचवणारे हे प्रदर्शन थक्क करणारे असल्याचे नमूद केले.

        कार्यक्रमात उत्कृष्ट सादरीकरणासाठी विविध विभागांना सन्मानचिन्ह देऊन गौरविण्यात आले. यामध्ये यंत्र इंडिया लिमिटेड (बेस्ट स्टॉल), म्युनिशन्स इंडिया लिमिटेड (संरक्षण उत्पादन), आयआयटी मुंबई (इनोव्हेशन), आरबीआय (वित्तीय साक्षरता), महाजेनको, महावितरण, एनपीसीआयएल, बीआयएस, एनईजीडी-एमईआयटीवाय, भाषिणी, महापारेषण, सीसीआरएस-आयुष, सीएसआयआर, एसबीआय, टी बोर्ड आणि आयआरसीटीसी या संस्थांचा सन्मान करण्यात आला.

कार्यक्रमाचे प्रास्ताविक दत्ता थोरे यांनी केले, सूत्रसंचालन संजय पाटील यांनी तर अखिला श्रीवासन यांनी आभार मानले.

Leave a Reply

Your email address will not be published. Required fields are marked *

error: Content is protected !!