अमळनेर : शहरासह ग्रामीण भागातील क्रीडाप्रेमी, युवा खेळाडू आणि बालकांसाठी आनंदाची बातमी आहे. येथील विजय नाना पाटील आर्मी स्कूल व ज्युनिअर कॉलेज परिसरात क्रिकेट नेट प्रॅक्टिससह अ‍ॅम्युझमेंट पार्क उभारण्याचा उपक्रम हाती घेण्यात आला आहे. या माध्यमातून क्रिकेटपटूंना सरावाची सुविधा मिळण्याबरोबरच विविध मैदानी खेळांसाठी खेळाडूंना मैदान उपलब्ध करून दिले जाणार आहे. त्यामुळे अमळनेरच्या क्रीडा क्षेत्राला नवी दिशा मिळण्याची अपेक्षा व्यक्त होत आहे.

या प्रस्तावित क्रीडा व मनोरंजन सुविधांच्या अनुषंगाने माजी मंत्री तथा संस्थेचे अध्यक्ष विजय नाना पाटील यांनी काही कर्मचाऱ्यांसह जागेची पाहणी केली. यावेळी संस्थेचे प्रशासकीय अधिकारी प्रा. शाम पवार यांनी प्रस्तावित उपक्रमाबाबत माहिती दिली.

शिक्षण महर्षी नानासाहेब विजय नवल पाटील, माजी केंद्रीय मंत्री तथा संस्थाध्यक्ष

“अमळनेर शहर व ग्रामीण भागातील युवकांना क्रीडा क्षेत्रात उत्तम संधी मिळावी, त्यांच्यातील क्रीडागुणांना योग्य व्यासपीठ मिळावे, हा या उपक्रमामागील मुख्य उद्देश आहे. क्रिकेट नेट प्रॅक्टिससह विविध मैदानी खेळांसाठी आवश्यक सुविधा उपलब्ध करून देण्याचा आमचा प्रयत्न आहे. त्याचबरोबर बालक, युवक आणि कुटुंबीयांना विरंगुळ्यासाठी अ‍ॅम्युझमेंट पार्कची सुविधा मिळणार आहे. या माध्यमातून अमळनेरमध्ये निरोगी जीवनशैली, क्रीडा संस्कृती आणि खेळाडू घडविण्याच्या प्रक्रियेला चालना मिळावी, अशी आमची भूमिका आहे.

प्रा. पवार यांनी सांगितले की, विजय नाना पाटील यांच्या मार्गदर्शनाखाली क्रिकेट नेट प्रॅक्टिससह अ‍ॅम्युझमेंट पार्क विकसित करण्यात येणार आहे. यामध्ये हॉर्स रायडिंग, क्रिकेट तसेच अ‍ॅथलेटिक्समधील गोळाफेक, थाळीफेक, भालाफेक यांसारख्या क्रीडा प्रकारांसाठी सुविधा उपलब्ध करून देण्यात येणार आहेत. तसेच ४०० मीटर धावण्याचा ट्रॅक, व्हॉलीबॉल, बास्केटबॉल, कबड्डी आणि खो-खो यांसारख्या मैदानी खेळांसाठीही मैदान उपलब्ध करून देण्याचे नियोजन आहे.

विशेष म्हणजे, दर शनिवार व रविवार हे क्रीडा मैदान सर्व आबालवृद्धांसाठी खुले ठेवण्याचे नियोजन असल्याचेही प्रा. पवार यांनी सांगितले. त्यामुळे खेळाडूंसह नागरिकांना आरोग्य, व्यायाम आणि मनोरंजनासाठी एक चांगली सुविधा उपलब्ध होणार आहे.

स्थानिक समितीमार्फत नियोज

क्रिकेट नेट प्रॅक्टिस व अ‍ॅम्युझमेंट पार्कची निर्मिती, नियोजन आणि व्यवस्थापनासाठी संस्थाध्यक्ष विजय नाना पाटील यांच्या अध्यक्षतेखाली स्थानिक समिती स्थापन करण्यात आली आहे. या समितीत संस्थेचे प्रशासकीय अधिकारी तसेच परिसरातील चारही महाविद्यालयांचे प्राचार्य सदस्य म्हणून काम पाहणार आहेत. समन्वयक म्हणून प्रा. शाम पवार जबाबदारी सांभाळणार आहेत.

या उपक्रमामुळे अमळनेर शहरासह ग्रामीण भागातील नवोदित खेळाडूंना सरावासाठी सुविधा मिळणार असून, विविध क्रीडा प्रकारांना प्रोत्साहन मिळण्यास मदत होणार आहे. तसेच बालक आणि कुटुंबीयांसाठी मनोरंजनाचे ठिकाण उपलब्ध होणार असल्याने हा परिसर क्रीडा व मनोरंजनाचे केंद्र म्हणून विकसित होण्याची शक्यता आहे.

यावेळी विजय नाना पाटील, आबासो डी. बी. पाटील, प्रा. शाम पवार,प्राचार्य किरण बाविस्कर,संजय कापडणे, प्राचार्य बाळू डी. पाटील, प्रा. डॉ. जे. एन. चव्हाण, प्रा. डॉ. विजय गाढे, कलाली येथील आदर्श शेतकरी कैलास पाटील, कैलास बडगुजर, मन्साराम सिसोदे आदी उपस्थित होते.