अमळनेर शहरातील रस्त्यांवरील धोकादायक काटेरी झाडे तातडीने हटवा…आम आदमी पार्टी

अमळनेर (प्रतिनिधी) : अमळनेर शहरातील प्रमुख रस्त्यांच्या कडेला वाढलेल्या काटेरी झाडे व झुडपांमुळे वाहतूक तसेच नागरिकांच्या सुरक्षिततेचा प्रश्न निर्माण झाला असून, ही झाडे व झुडपे तातडीने हटवावीत, अशी मागणी आम आदमी पार्टी, तालुका अमळनेर यांच्या वतीने अमळनेर नगरपरिषद प्रशासनाकडे करण्यात आली आहे.

यासंदर्भात तालुका अध्यक्ष महेंद्र नाना साळुंखे आणि तालुका उपाध्यक्ष रामकृष्ण चिंतामण देवरे यांनी ४ सप्टेंबर रोजी मुख्याधिकारी यांना निवेदन दिले. शहरातील गलवाडे रोड, पिंपळे रोड, टेकू रोड, मारवड रोड तसेच नव्याने बांधण्यात आलेल्या ८० फूट रस्त्याच्या कडेला मोठ्या प्रमाणात काटेरी झाडे व झुडपे वाढली असल्याचे निवेदनात नमूद करण्यात आले आहे.

या झाडांमुळे ८० फूट रस्त्याच्या कडेला असलेली दृष्यमानता कमी होत असून, रस्त्याची रुंदीही कमी होत आहे. वळणावर किंवा रस्त्याच्या कडेला वाढलेल्या झाडांमुळे समोरून येणारी वाहने स्पष्ट दिसत नसल्याने अपघाताची शक्यता वाढली आहे.

तसेच काटेरी झाडांच्या फांद्या रस्त्यावर आल्याने दुचाकीस्वार, पादचारी आणि शाळेत जाणाऱ्या विद्यार्थ्यांना त्रास होण्याची शक्यता असल्याचेही निवेदनात म्हटले आहे. या मार्गांवर दररोज हजारो नागरिक व वाहने ये-जा करत असल्याने मोठी दुर्घटना घडण्यापूर्वी प्रशासनाने या समस्येची गंभीर दखल घ्यावी, अशी मागणी करण्यात आली.

गलवाडे रोड, पिंपळे रोड, टेकू रोड, मारवड रोड आणि नव्या ८० फूट रस्त्यालगत वाढलेली सर्व काटेरी झाडे व झुडपे तात्काळ व तत्परतेने तोडून रस्ते मोकळे करावेत, अशी आग्रही मागणी आम आदमी पार्टीने नगरपरिषद प्रशासनाकडे केली आहे.याप्रसंगी तालुका अध्यक्ष महेंद्र साळुंखे,रामकृष्ण देवरे आदी उपस्थित होते.