अतिवृष्टीपाठोपाठ पावसाची दडी;….अमळनेर तालुका दुष्काळग्रस्त जाहीर करा! क्रांतिकारी शेतकरी संघटनेचे तहसीलदारांना निवेदन

अमळनेर : ३१ जुलै रोजी झालेल्या अतिवृष्टीमुळे तसेच बोरी नदीला आलेल्या महापुरामुळे अमळनेर तालुक्यातील अनेक शेतकऱ्यांच्या शेतात पाणी साचून पिकांचे मोठे नुकसान झाले आहे. मात्र, प्रशासनाकडून सरसकट पंचनामे न करता काही ठिकाणी तोंडदेखले अथवा अर्धवट पंचनामे करण्यात आल्याचा आरोप क्रांतिकारी शेतकरी संघटनेने केला आहे. त्यानंतर ऑगस्ट महिन्यापासून पावसाने दडी मारल्याने पिके उन्हाच्या तडाख्यात सुकू लागली असून शेतकऱ्यांमध्ये मोठी चिंता निर्माण झाली आहे.

या पार्श्वभूमीवर अमळनेर तालुका दुष्काळी जाहीर करावा, अशी जोरदार मागणी क्रांतिकारी शेतकरी संघटनेतर्फे तहसीलदारांना निवेदन देऊन करण्यात आली आहे.

निवेदनात म्हटले आहे की, अतिवृष्टी व महापुरामुळे झालेल्या नुकसानीनंतर अनेक शेतकऱ्यांना अपेक्षित मदत मिळालेली नाही. त्यातच ऑगस्टपासून पावसाने दडी मारल्याने पिकांची अवस्था बिकट झाली आहे. हातातोंडाशी आलेली पिके नष्ट होण्याची भीती निर्माण झाल्याने शेतकरी आर्थिक संकटात सापडण्याची शक्यता आहे.

शेतकऱ्यांना तातडीने मदत मिळण्यासाठी प्रशासनाने सरसकट पंचनामे करावेत, तसेच तालुक्यातील दुष्काळी परिस्थितीची तातडीने दखल घेऊन अमळनेर तालुका दुष्काळग्रस्त जाहीर करावा, अशी मागणी संघटनेने केली आहे.

तसेच पीकविमा योजनेबाबत सरकारचे धोरण स्पष्ट करावे, अशीही मागणी निवेदनातून करण्यात आली आहे. पीकविमा भरण्याची रक्कम कमी करण्यात आली असून, शासन कोणत्या धोरणानुसार पीकविमा जाहीर करणार आहे, याबाबत शेतकऱ्यांना स्पष्ट माहिती देण्याची मागणी करण्यात आली आहे.

या सर्व मागण्या शासन दरबारी पोहोचवून कृषिमंत्री तसेच मुख्यमंत्र्यांकडे निवेदन सादर करावे, अशी विनंतीही संघटनेने तहसील प्रशासनाकडे केली आहे.

क्रांतिकारी शेतकरी संघटनेचे जिल्हाध्यक्ष शरद पाटील,उपाध्यक्ष प्रकाश बोरसे, तालुका अध्यक्ष संदिप सैंदाणे, तालुका उपाध्यक्ष अमजद खान पठान, सरचिटणीस भूषण कोळी आदी पदाधिकारी व कार्यकर्ते यांनी निवेदनावर स्वाक्षऱ्या करून शेतकऱ्यांच्या प्रश्नांकडे प्रशासनाचे लक्ष वेधले.