कोयता घेऊन धावला, मानेवर वार केला; नागरिकांनी आवळल्या दादूच्या मुसक्या!…… गांधलीपुरा भागातील घटनेने खळबळ; तरुणाने प्रसंगावधान राखत चुकवला जीवघेणा वार

अमळनेर (प्रतिनिधी) : गांधलीपुरा भागातील भरुचा वाईन शॉपजवळ एका तरुणावर कोयत्याने वार करून प्राणघातक हल्ला करण्याचा प्रयत्न केल्याची घटना ५ सप्टेंबर रोजी रात्री सव्वा आठ वाजेच्या सुमारास घडली. या प्रकरणी सराईत गुन्हेगार राजेश उर्फ दादू धोबी याला अमळनेर पोलिसांनी अटक केली आहे.

याबाबत पोलिसांनी दिलेल्या माहितीनुसार, परेश रवींद्र उदेवाल (वय २८, रा. राजाराम नगर, शिरूड नाका) हे रात्री गांधलीपुरा भागातून पायी जात असताना राजेश उर्फ दादू धोबी त्यांच्यासमोर आला. त्याने परेश यांना अश्लील शिवीगाळ करत, ‘तू पोलिसांचा खबरी आहेस, तुझ्यामुळे मला त्रास होत आहे,’ असे म्हणत कमरेला लावलेला कोयता काढला आणि त्यांच्यावर वार करण्याचा प्रयत्न केला.

परेश यांनी तेथून पळ काढल्यानंतर दादू धोबीने त्यांचा पाठलाग केला. भरुचा वाईन शॉपजवळ त्याने परेश यांना अडवून त्यांच्या मानेवर कोयत्याने वार करण्याचा प्रयत्न केला. मात्र, परेश यांनी प्रसंगावधान राखत वार चुकवला आणि आरडाओरड केली. आवाज ऐकून परिसरातील नागरिक धावून आले आणि त्यांनी परेश यांची दादूच्या तावडीतून सुटका केली.

दरम्यान, दादू धोबीने नागरिकांवरही कोयता उगारून धमक्या दिल्याने संतप्त नागरिकांनी त्याला पकडून चोप दिला. घटनेची माहिती मिळताच उपविभागीय पोलिस अधिकारी विनायक कोते आणि पोलिस निरीक्षक दत्तात्रय निकम यांनी घटनास्थळी भेट देऊन पाहणी केली.

या प्रकरणी परेश रवींद्र उदेवाल यांच्या फिर्यादीवरून अमळनेर पोलिस ठाण्यात राजेश उर्फ दादू धोबी याच्याविरुद्ध भारतीय न्यायसंहितेच्या कलम १०९ (१), ११५ (२), १२६ (२), ३५१ (२) आणि ३५२ अन्वये गुन्हा दाखल करण्यात आला आहे. पोलिसांनी त्याला अटक केली असून पुढील तपास पोलिस उपनिरीक्षक समाधान गायकवाड करीत आहेत.