अमळनेर: आगामी ‘ईद-ए-मिलाद’ सण शांततेत, शिस्तीत आणि निर्विघ्नपणे पार पडावा यासाठी अमळनेर शहरात आज, दिनांक २४ ऑगस्ट २०२६ रोजी सकाळी १०:०० ते ११:२० या वेळेत पोलीस प्रशासनातर्फे भव्य रूट मार्च (संचलन) काढण्यात आला. जळगाव जिल्ह्याचे पोलीस अधीक्षक श्री. श्रीकांत धिवरे यांच्या प्रमुख उपस्थितीत हा रूट मार्च पार पडला.
संवेदनशील भागातून संचलन
शहरातील कायदा व सुव्यवस्था अबाधित राहावी आणि नागरिकांमध्ये सुरक्षेची भावना निर्माण व्हावी या उद्देशाने हा रूट मार्च काढण्यात आला. संचलनाची सुरुवात आणि मार्गक्रमण शहरातील संवेदनशील मानल्या जाणाऱ्या प्रमुख भागांतून झाले. यामध्ये डॉ. बाबासाहेब आंबेडकर चौक, पाच कंदील चौक, दगडी दरवाजा, सराफ बाजार, पानखिडकी, वाडी चौक, कसाली डीपी, आखाडा मकान, झामी चौक, पवन चौक, तिरंगा चौक आणि गांधलीपुरा चौकी या भागांचा समावेश होता.
वरिष्ठ अधिकाऱ्यांचे नेतृत्व व तगडा पोलीस बंदोबस्त
सदर रूट मार्चचे नेतृत्व पोलीस अधीक्षक श्री. श्रीकांत धिवरे, चाळीसगाव परिमंडळाचे अपर पोलीस अधीक्षक श्री. अशोक नखाते तसेच अमळनेर भागाचे उपविभागीय पोलीस अधिकारी श्री. विनायक कोते यांनी केले.
या संचलनात विविध पोलीस ठाण्यांचे बळ आणि विशेष पथके मोठ्या संख्येने सहभागी झाली होती:
अमळनेर पोलीस ठाणे: ०६ अधिकारी व ४८ अंमलदार
मारवड पोलीस ठाणे: ०२ अधिकारी व १५ अंमलदार
एरंडोल पोलीस ठाणे: ०१ अधिकारी व १० अंमलदार
धरणगाव पोलीस ठाणे: ०१ अधिकारी व ०३ अंमलदार
चोपडा ग्रामीण पोलीस ठाणे: ०३ अंमलदार
चोपडा शहर पोलीस ठाणे: ०३ अंमलदार
विशेष पथके: पोलीस मुख्यालयाकडील ३ दंगा नियंत्रण पथके (RCP), १ शीघ्र कृती दल (QRT) पथक आणि पोलीस मुख्यालय जळगावचे बँड पथक.
एकूण ११ अधिकारी आणि १२५ पोलीस अंमलदारांच्या शिस्तबद्ध संचलनामुळे शहरात चोख पोलीस बंदोबस्ताचे दर्शन घडले. सणादरम्यान शांतता भंग करणाऱ्यांवर कडक कारवाई केली जाईल, असा स्पष्ट संदेश या रूट मार्चद्वारे प्रशासनाने दिला आहे.
