आयएएस तुकाराम मुंढे यांच्या प्रेरणादायी व्याख्यानाचे अमळनेरमध्ये लवकरच आयोजन; डॉ. दीपक पाटील यांनी घेतली मुंबईत ‘ग्रेट भेट’

अमळनेर : महाराष्ट्रातील २००५ बॅचचे अत्यंत धडाकेबाज, प्रामाणिक आणि कडक शिस्तीचे आयएएस (IAS) अधिकारी, तसेच ‘रियल सिंघम’ व युवकांचे प्रेरणास्थान म्हणून ओळखले जाणारे अन्न व औषध प्रशासन (FDA) आयुक्त आदरणीय श्री. तुकाराम मुंढे साहेब यांची मुंबई येथील सह्याद्री अतिथी गृह येथे एक विशेष ‘ग्रेट भेट’ घेण्यात आली. अमळनेर पंचायत समितीचे माजी सभापती तथा पशुधन पर्यवेक्षक डॉ. दीपक पंढरीनाथ पाटील (रा. मांडळ) यांनी ही भेट घेऊन त्यांना अमळनेर येथे येण्याचे आदरपूर्वक निमंत्रण दिले.

अमळनेर तालुक्यातील तरुण युवक-युवतींना मार्गदर्शन आणि प्रेरणा मिळावी, या उद्देशाने आदरणीय तुकाराम मुंढे साहेबांच्या प्रेरणादायी व्याख्यानाचे आयोजन करण्याचे नियोजन डॉ. दीपक पाटील यांनी केले आहे. हे व्याख्यान ऐतिहासिक प्रताप महाविद्यालय किंवा छत्रपती शिवाजी महाराज नाट्यगृह येथे आयोजित करण्याचा मानस असून, त्याबाबतची संपूर्ण कल्पना मुंढे साहेबांना या भेटीदरम्यान देण्यात आली.

श्री. तुकाराम मुंढे साहेबांनी या निमंत्रणाचा सकारात्मक स्वीकार केला असून, अमळनेर येथील व्याख्यानासाठी ते लवकरच आपली तारीख निश्चित करून कळवणार आहेत. या धडाकेबाज अधिकाऱ्याचे मार्गदर्शन लाभणार असल्याने अमळनेर तालुक्यातील तरुणांमध्ये मोठा उत्साह निर्माण झाला आहे.

या प्रसंगी डॉ. दीपक पाटील यांच्यासोबत श्री. बापूसाहेब (श्री. बी. एम. पाटील) हेदेखील उपस्थित होते. लवकरच तारखेची घोषणा करून अमळनेरमधील युवक-युवतींसाठी हे भव्य व्याख्यान पार पडणार आहे.