आदिवासी विद्यार्थ्यांची कोट्यवधींची आर्थिक लूट आणि विद्यार्थिनींचा अमानुष छळ; ‘NSUI’ आक्रमक, मंत्र्यांकडे दाद

 नंदुरबार : येथील MKD नर्सिंग कॉलेजमध्ये आदिवासी विद्यार्थ्यांवर होत असलेल्या गंभीर अन्यायाविरोधात आणि अमानुष छळाविरोधात ‘NSUI’ (नॅशनल स्टुडंट्स युनियन ऑफ इंडिया) च्या शिष्टमंडळाने आक्रमक पाऊल उचलले आहे. पीडित आदिवासी विद्यार्थ्यांना सोबत घेऊन शिष्टमंडळाने आज राज्याचे वैद्यकीय शिक्षण मंत्री मा. हसन मुश्रीफ यांची भेट घेतली व त्यांना या धक्कादायक प्रकाराची सखोल चौकशी करून दोषींवर कठोर कारवाई करण्याचे निवेदन दिले. संबंधित महाविद्यालय हे शिंदे सेनेचे आमदार किशोर दराडे यांच्याशी संबंधित असल्याचे सांगण्यात येत आहे.

३५० हून अधिक विद्यार्थ्यांची आर्थिक लूट

सदर महाविद्यालयात शिकणाऱ्या आदिवासी विद्यार्थ्यांना १०० टक्के शिष्यवृत्ती (स्कॉलरशिप) मंजूर असतानाही, इतर खर्चाच्या नावाखाली प्रत्येकी १ लाख रुपये ऑनलाइन स्वरूपात वसूल करण्यात आले आहेत. सुमारे ३५० पेक्षा अधिक विद्यार्थ्यांकडून अशा प्रकारे कोट्यवधी रुपयांची बेकायदेशीर वसुली करण्यात आल्याची गंभीर बाब या निवेदनातून समोर आली आहे.

विद्यार्थिनींचा अमानुष छळ आणि लज्जास्पद वागणूक

आर्थिक लुटीसोबतच महाविद्यालयाच्या हॉस्टेलमध्ये विद्यार्थिनींना अत्यंत अमानुष वागणूक दिली जात असल्याच्या तक्रारी समोर आल्या आहेत:

साहित्याची होळी: हॉस्टेलमध्ये न राहिल्याच्या कारणावरून एका विद्यार्थिनीचे कपडे आणि झोपण्याची गादी थेट जाळून टाकण्यात आली.

वॉशरूम बंद: या अमानुष कृत्याला विरोध केला म्हणून हॉस्टेलमधील सर्व मुलींचे वॉशरूम दिवसभर बंद ठेवण्यात आले.

लज्जास्पद शारीरिक तपासणी: अत्यंत धक्कादायक बाब म्हणजे, दोन विद्यार्थिनींना मासिक पाळी (Periods) सुरू आहे की नाही, याची खात्री करण्यासाठी महिला वॉर्डनने त्यांची शारीरिक तपासणी केल्याचा गंभीर आरोप विद्यार्थिनींनी केला आहे.

शैक्षणिक भवितव्याशी खेळ

विद्यार्थ्यांचे नर्सिंगचे शिक्षण सुरू असले तरी आजपर्यंत त्यांचे कोणतेही प्रॅक्टिकल्स घेण्यात आलेले नाहीत. याशिवाय, दरवर्षी प्रत्येक विद्यार्थ्याला वेगवेगळ्या महाविद्यालयांचे ओळखपत्र (ID Card) दिले जात असल्यामुळे विद्यार्थ्यांमध्ये तीव्र संभ्रम आणि भीतीचे वातावरण निर्माण झाले आहे.

नेत्यांना साकडे आणि ‘NSUI’ची आक्रमक मागणी

या सर्व गंभीर प्रकरणाची दखल घेत NSUI तर्फे वैद्यकीय शिक्षण मंत्री मा. हसन मुश्रीफ यांच्यासह काँग्रेस विधिमंडळ पक्षाचे नेते मा. सतेज (बंटी) पाटील, विधानसभा उपाध्यक्ष मा. नीलम गोऱ्हे आणि आमदार मा. गोकुळ गिते यांनाही लेखी निवेदन देऊन न्यायाची मागणी करण्यात आली आहे.

यावेळी NSUI चे प्रदेश अध्यक्ष सागर साळुंके, जळगाव जिल्हाध्यक्ष अॅड. कौस्तुभ पाटील, नंदुरबार जिल्हाध्यक्ष सागर पावरा, प्रदेश महासचिव श्वेता पाटील, सचिन पावरा यांच्यासह पीडित विद्यार्थी-विद्यार्थिनी मोठ्या संख्येने उपस्थित होते. या प्रकरणाची उच्चस्तरीय चौकशी करून दोषींवर तात्काळ कडक कायदेशीर कारवाई न झाल्यास तीव्र आंदोलनाचा इशारा देण्यात आला आहे.