अमळनेर : घरात एकटी असलेल्या अल्पवयीन मुलीचा हात धरून तिच्यावर लैंगिक अत्याचार करण्याचा प्रयत्न करणाऱ्या आरोपी सलमान खान अख्तर खान (वय २८, रा. हमीद नगर, चोपडा) याला न्यायालयाने दोषी ठरवून ५ वर्षे सश्रम कारावास आणि साडेपाच हजार रुपये दंडाची ठोठावली आहे. अमळनेर येथील जिल्हा व अतिरिक्त सत्र न्यायाधीश श्रीमती सी. व्ही. पाटील यांनी हा महत्त्वपूर्ण निकाल दिला.
काय आहे नेमकी घटना?
ही घटना १२ ऑगस्ट २०२४ रोजी दुपारी १ ते दीड वाजेच्या सुमारास घडली होती. पीडित मुलीचे आई-वडील घराबाहेर बांधकामाच्या साईटवर मजुरीसाठी गेले होते. लहान भावंडांना सांभाळण्यासाठी पीडित मुलगी घरीच थांबली होती. याचाच फायदा घेऊन शेजारी बांधकामावर काम करणाऱ्या सलमान शेख (खान) याने घरात प्रवेश केला. त्याने लहान बहिणीला बळजबरीने घराबाहेर काढले आणि पीडितेसोबत अश्लील चाळे करण्यास सुरुवात केली.पीडितेने प्रतिकार करत आरडाओरडा केला, तेव्हा तिची लहान बहीण धावत घरात आली आणि तिनेही बाहेर पळत जाऊन आरडाओरडा सुरू केला. यामुळे घाबरून आरोपी सलमान घटनास्थळावरून पळून गेला. आई-वडील घरी परतल्यानंतर पीडित मुलीने हा धक्कादायक प्रकार त्यांना सांगितला, ज्यानंतर चोपडा शहर पोलीस ठाण्यात गुन्हा दाखल करण्यात आला.
