अमळनेर : अहिल्यानगर येथे नुकत्याच संपन्न झालेल्या एका भव्य सोहळ्यात अमळनेरच्या क्रीडा क्षेत्राचा गौरव झाला आहे. छत्रपती संभाजी महाराज, पुण्यश्लोक अहिल्याबाई होळकर व राष्ट्रसंत तुकडोजी महाराज यांच्या जयंतीनिमित्त आयोजित ६ वे राज्यस्तरीय ग्रामीण साहित्य संमेलन व “राज्यस्तरीय शिक्षक पुरस्कार वितरण सोहळा २०२६” मोठ्या उत्साहात पार पडला. या सोहळ्यात अमळनेर येथील तीन नामांकित क्रीडा शिक्षकांना त्यांच्या उत्कृष्ट कार्याबद्दल राज्यस्तरीय पुरस्कारांनी सन्मानित करण्यात आले.
ग्रामीण संस्कृती आणि शिक्षकांचा सन्मान
या सोहळ्याला महाराष्ट्रातील नामवंत कवी, लेखक, गायक, ग्रामीण साहित्यिक, पोवाडाकार, लावणी सम्राट आणि प्रबोधनकार मोठ्या संख्येने उपस्थित होते. “ग्रामीण संस्कृती जपण्यासाठी ग्रामीण साहित्य जपणे व त्याचे संवर्धन करणे हे आपले सर्वांचे कर्तव्य आहे,” असा सूर या संमेलनात उमटला. याच कार्यक्रमाचे औचित्य साधून महाराष्ट्रातील शैक्षणिक व विविध क्षेत्रांत उल्लेखनीय कार्य करणाऱ्या शिक्षकांचा शाल, श्रीफळ, बुके, सन्मानपत्र आणि सन्मानचिन्ह देऊन गौरव करण्यात आला.
