अंमळनेर: सध्या सर्वत्र उन्हाचा तडाखा वाढत असताना, अंगाची लाहीलाही करणाऱ्या ‘धगधगत्या’ उन्हातही वाहतूक पोलीस आपले कर्तव्य बजावत आहेत. अशाच एका कडक उन्हात कर्तव्यावर असताना वाहतूक नियंत्रण शाखेचे पोलीस कर्मचारी संजय बोरसे व रविंद्र बोरसे यांनी माणुसकीचे दर्शन घडवले.

​नेमकी घटना काय?

​    बस स्थानक परिसरात बद्रीनाथ मंदिराचे पुजारी श्रीहरी दिक्षित (वय ६९) अचानक उन्हाच्या तीव्रतेमुळे चक्कर येऊन कोसळले. ही बाब लक्षात येताच, तिथे कार्यरत असलेले पोलीस कर्मचारी संजय बोरसे व रविंद्र बोरसे यांनी क्षणाचाही विलंब न लावता इतरांच्या मदतीने पुजाऱ्यांना तात्काळ ऑटो रिक्षा मधून ग्रामीण रुग्णालयात हलवले. मात्र, दुर्दैवाने रुग्णालयातील डॉक्टरांनी त्यांना तपासून ‘मयत’ घोषित केले.पुढील तपास पो कॉ मिलिंद सोनार करत आहेत.

​पोलीस प्रशासनाचे नागरिकांना आवाहन

​या दुर्दैवी घटनेच्या पार्श्वभूमीवर, पोलीस कर्मचाऱ्यांनी नागरिकांच्या सुरक्षिततेसाठी काही महत्त्वाच्या सूचना केल्या आहेत:

​वयोवृद्ध नागरिकांनी या कडक उन्हात अत्यावश्यक कामाशिवाय घराबाहेर पडू नये.

​महिला आणि बालकांनी देखील उन्हाची तीव्रता लक्षात घेऊन आवश्यक असेल तरच बाहेर निगावे.

​घराबाहेर पडताना डोक्यावर टोपी, रुमाल आणि सोबत पाण्याची बाटली ठेवून आवश्यक ती काळजी घ्यावी.

​      भर उन्हात आपले कर्तव्य चोख बजावत असतानाच एका नागरिकाचा जीव वाचवण्यासाठी संजय बोरसे व रविंद्र बोरसे यांनी दाखवलेल्या तत्परतेचे सर्वत्र कौतुक होत आहे, तरीही पुजाऱ्यांच्या निधनाने परिसरात हळहळ व्यक्त केली जात आहे.