अमळनेर : अमळनेर तालुका शेतकरी सहकारी संघाच्या आगामी निवडणुकीसाठी राजकीय हालचालींना वेग आला असून, भारतीय राष्ट्रीय काँग्रेसने आपली रणनीती स्पष्ट केली आहे. काल दि. ६ मे २०२६ रोजी सायंकाळी अमळनेर टाऊन हॉलमध्ये तालुका काँग्रेस कमिटीची महत्त्वपूर्ण बैठक संपन्न झाली. या बैठकीत सर्वानुमते ‘शेतकरी पॅनल’ स्थापन करण्याचा निर्णय घेण्यात आला असून, ११ मे रोजी विजय मारुती मंदिरात नारळ वाढवून प्रचाराचा शुभारंभ केला जाणार आहे.
सुकाणू समितीची स्थापना
निवडणूक प्रक्रिया सुलभ व्हावी आणि योग्य उमेदवारांची निवड व्हावी यासाठी एका ‘सुकाणू समिती’ची घोषणा करण्यात आली. यामध्ये खालील मान्यवरांचा समावेश आहे:
बी. के. सूर्यवंशी (तालुकाध्यक्ष, काँग्रेस)
धनगर दला पाटील (माजी सभापती, पं.स.)
सुरेश पीरण पाटील (जिल्हाध्यक्ष, किसान काँग्रेस)
प्रा. सुभाष पाटील (संचालक, बाजार समिती)
गोकुळ पाटील (माजी तालुकाध्यक्ष)
प्रा. शाम पवार (समन्वयक)
उमेदवारांचा विश्वास; कोरे माघार अर्ज समितीकडे
बैठकीचे वैशिष्ट्य म्हणजे, पॅनल बांधणीचे सर्व अधिकार सुकाणू समितीला देण्यात आले आहेत. पक्षनिष्ठेचे दर्शन घडवत ३० ते ३५ इच्छुक उमेदवारांनी स्वतःच्या सह्यांचे माघारीचे अर्ज सुकाणू समितीकडे स्वेच्छेने सुपूर्द केले. यामुळे बंडखोरी टाळून एकदिलाने निवडणूक लढवण्याचा मार्ग मोकळा झाला आहे.
निवडणुकीतील वास्तव आणि रणनीती
बैठकीत संदीप सैंदाणे, दिनेश पाटील, शहराध्यक्ष गजेंद्र साळुंखे यांच्यासह अनेकांनी विचार मांडले. प्रा. सुभाष पाटील व सुरेश दादा पाटील यांनी निवडणुकीतील आव्हानांवर प्रकाश टाकला.
“निवडणूक निष्ठेने लढणे आवश्यक आहे. मतदार यादीत मयत मतदारांची संख्या मोठी असल्याने बोगस मतदानावर लक्ष ठेवणे आणि स्थानिक भागातीलच पोलिंग एजंट नेमणे प्रभावी ठरेल,” असे मत नेत्यांनी व्यक्त केले.
सेवादल अध्यक्षांचा सत्कार
यावेळी महाराष्ट्र प्रदेश काँग्रेस कमिटीतर्फे नवनियुक्त तालुका सेवा दल अध्यक्ष बन्सीलाल भागवत आणि शहर सेवा दल अध्यक्ष भिकाजी रामचंद्र पाटील यांचा सत्कार करण्यात आला.
उत्साही सांगता
या बैठकीला प्रताप पाटील, मनोज पाटील, प्रा. विश्वनाथ ठाकरे, त्र्यंबक पाटील, सुरेश कदम, प्रवीण जैन यांसह अनेक पदाधिकारी उपस्थित होते. ‘भारतीय राष्ट्रीय काँग्रेस जिंदाबाद’च्या घोषणांनी टाऊन हॉल परिसर दणाणून गेला होता. कार्यक्रमाचे सूत्रसंचालन प्रा. शाम पवार यांनी केले, तर सायंकाळी ७ वाजता बैठकीची सांगता झाली.
