मतदार याद्यांचे सक्षमीकरण म्हणजे पुढील २५ वर्षांची सोय; आ. अनिल भाईदास पाटील यांचे कार्यकर्त्यांना आवाहन

   अमळनेर | “आपल्याला पुढील सर्व निवडणुका सोप्या करायच्या असतील, तर मतदार यादी विशेष संक्षिप्त पुनरीक्षण मोहिमेवर (SIR) अत्यंत बारकाईने लक्ष द्या. या मोहिमेतून तयार होणाऱ्या मतदार याद्या म्हणजे पुढील २० ते २५ वर्षांची सोय असून, आपल्या राजकीय भवितव्याचा तो आत्मा आहे,” असे प्रतिपादन माजी मंत्री तथा आमदार अनिल भाईदास पाटील यांनी केले.

        अमळनेर येथील बन्सीलाल पॅलेसमध्ये आयोजित राष्ट्रवादी काँग्रेस पार्टीच्या ‘बूथ कार्यकर्ता मेळाव्यात’ ते बोलत होते. यावेळी शहर आणि ग्रामीण भागातील बूथ कार्यकर्ते मोठ्या संख्येने उपस्थित होते.

‘SIR’ मोहीम: मतदार यादीची विशेष साफसफाई

     निवडणूक आयोगाच्या SIR मोहिमेचे महत्त्व विशद करताना आमदार पाटील म्हणाले की, ही मोहीम म्हणजे मतदार यादी अपडेट करण्याची मोठी संधी आहे. यामध्ये:

१८ वर्षे पूर्ण झालेल्या नवीन मतदारांची नाव नोंदणी करणे.

मृत आणि स्थलांतरित मतदारांची नावे वगळणे.

नाव, पत्ता, फोटो किंवा वयातील चुका दुरुस्त करणे.

“BLO (बूथ लेव्हल ऑफिसर) घरोघरी जाऊन ही माहिती तपासतात. कार्यकर्त्यांनी त्यांच्याशी समन्वय राखून आपल्या भागातील यादी निर्दोष करावी,” अशा सूचना त्यांनी दिल्या.

‘माझं बूथ प्लस’ म्हणजे पक्षाचा विजय

        बूथ रचनेवर भर देताना आ. पाटील म्हणाले की, “बूथवर मिळालेले मतदान हे राजकारणातील ‘थर्मामीटर’ असते. पालिका निवडणुकीतील चुकांमधून शिकून आपल्याला पुढे जायचे आहे. आगामी काळात मॅपिंगद्वारे दुबार नावे वगळली जाणार असून, मतदारसंघातून सुमारे ३२ हजार नावे कमी होऊ शकतात. त्यामुळे बूथ कार्यकर्त्यांनी सतर्क राहून आपली रचना पक्की करावी.” तसेच, येणाऱ्या काळात बूथ कार्यकर्त्यांना थेट प्रवेशाचे धोरण उपमुख्यमंत्री सुनेत्राताई पवार अवलंबणार असल्याचेही त्यांनी आवर्जून नमूद केले.

मान्यवरांची उपस्थिती आणि मार्गदर्शन

       कार्यक्रमाच्या सुरुवातीला राष्ट्रवादी काँग्रेसचे जिल्हाध्यक्ष संजय पवार यांनी मार्गदर्शन करत सर्व कार्यकर्त्यांना मोहिमेसाठी सज्ज होण्याचे आवाहन केले. माजी नगरसेवक विक्रांत पाटील यांनी प्रास्ताविक केले, तर जिल्हा प्रवक्ते योगेश देसले व तालुकाध्यक्ष भागवत पाटील यांनी आपली मनोगते व्यक्त केली.

मंचावरील प्रमुख उपस्थिती:

       माजी नगराध्यक्षा सौ. जयश्री अनिल पाटील, ज्येष्ठ नेत्या सौ. तिलोत्तमा पाटील, शहराध्यक्ष मुक्तार खाटीक, नूतन शहराध्यक्ष चेतन राजपूत, मार्केट सभापती अशोक आधार पाटील, जितुभाऊ ठाकूर, महिला अध्यक्ष मंदाकिनी भामरे, युवक शहराध्यक्ष पंकज साळी, युवक ग्रामीण अध्यक्ष तारकेश्वर गांगुर्डे आदी मान्यवर उपस्थित होते.

     कार्यक्रमाचे सूत्रसंचालन विनोद कदम सर यांनी केले तर आभार सुनील काटे यांनी मानले. या मेळाव्यास बाजार समितीचे संचालक, माजी लोकप्रतिनिधी, सरपंच, सोसायटी चेअरमन आणि पक्षाचे सर्व सेलचे पदाधिकारी मोठ्या संख्येने उपस्थित होते.