अमळनेर : शहराच्या सर्वांगीण, संतुलित व शाश्वत विकासाच्या दृष्टीने अमळनेर नगरपरिषदेचा आर्थिक वर्ष २०२६–२७ चा अर्थसंकल्प सभागृहात विधिवत सादर करण्यात आला. नागरिकांवर कोणताही अतिरिक्त करभार न टाकता विकासाला गती देण्याचा स्पष्ट संकल्प या अर्थसंकल्पातून व्यक्त करण्यात आला आहे.

       सदर अर्थसंकल्प अध्यक्ष श्री. परीक्षित बाविस्कर यांच्या अध्यक्षतेखाली पार पडलेल्या सभेत मुख्याधिकारी श्री. गणेश शिंदे यांनी सादर केला. उपाध्यक्ष श्री. प्रशांत निकम तसेच सर्व माननीय नगरसेवक/नगरसेविका यांच्या उपस्थितीत अर्थसंकल्पावर सविस्तर चर्चा करण्यात आली. विविध सूचना व प्रभागनिहाय अपेक्षा विचारात घेऊन अर्थसंकल्पास सर्वानुमते मंजुरी देण्यात आली.

🔹 अर्थसंकल्पातील प्रमुख मुद्दे :

       नागरिकांवर कोणतीही नव्याने करवाढ प्रस्तावित करण्यात आलेली नाही. नागरिकांना दिलासा देण्याच्या भूमिकेतून मालमत्ता हस्तांतरण फी २% वरून १% करण्याचा प्रस्ताव स्थायी समितीमध्ये मंजूर करण्यात आलेला असून विशेष सर्वसाधारण सभेने देखील तो एकमताने मंजूर केलेला आहे.

पाणीपुरवठा व्यवस्थेचे सुदृढीकरण व दीर्घकालीन उपाययोजना हाती घेण्यावर भर.

शहरातील अंतर्गत तसेच प्रमुख रस्त्यांच्या विकासकामांना विशेष प्राधान्य.

स्वच्छता, घनकचरा व्यवस्थापन व पर्यावरणपूरक उपक्रमांसाठी स्वतंत्र तरतूद.

नागरी सेवा व मूलभूत सुविधांच्या उन्नतीसाठी आवश्यक आर्थिक नियोजन.

 केंद्र व राज्य शासनामार्फत राबविण्यात येणाऱ्या विविध विकास योजनांसाठी निधी मागणीमध्ये वाढ प्रस्तावित करण्यात आलेली असून अधिकाधिक अनुदान प्राप्त करून शहरातील प्रलंबित व नव्या विकासकामांना गती देण्याचे नियोजन करण्यात आले आहे.

आर्थिक शिस्त, पारदर्शकता व वेळबद्ध कार्यवाही यांवर विशेष लक्ष केंद्रीत.

     सदर अर्थसंकल्पानुसार एकूण महसुली उत्पन्न अंदाजित रु. ९३.८४ कोटी तर भांडवली उत्पन्न अंदाजित रु. २८९.९९ कोटी प्रस्तावित करण्यात आलेले असून एकूण जमा रु. ३८३.८३ कोटींचा ऐतिहासिक व जादुई टप्पा गाठण्यात आलेला आहे. नगरपरिषदेच्या आर्थिक नियोजनशक्तीचा व वाढत्या विकास दृष्टिकोनाचा हा प्रत्ययकारी दाखला मानला जात आहे.

       तसेच एकूण महसुली अंदाजित खर्च रु. ९३.८१ कोटी व भांडवली अंदाजित खर्च रु. २८९.९९ कोटी प्रस्तावित करण्यात आलेला असून काटेकोर आर्थिक शिस्त व नियोजनबद्ध अंमलबजावणीमुळे अंदाजे रु. ३.१६ लाख इतकी शिल्लक राखण्यात येणार असल्याचे नमूद करण्यात आले.

       मुख्याधिकारी श्री. गणेश शिंदे यांनी नियोजनबद्ध खर्च व वेळेत अंमलबजावणी यावर भर देण्यात येणार असल्याचे स्पष्ट केले.

       करवाढी विना विकास, नियोजनबद्ध खर्च, वाढती आर्थिक क्षमता आणि शासन अनुदानाचा जास्तीत जास्त उपयोग या तत्त्वांवर आधारित हा अर्थसंकल्प अमळनेर शहराच्या प्रगतीचा नवा अध्याय ठरेल, असा विश्वास व्यक्त करण्यात आला.

अमळनेर शहर स्वच्छ, सुंदर, हरित व आधुनिक बनविण्याच्या संकल्पपूर्तीसाठी सर्व नागरिकांनी सक्रिय सहकार्य करावे, असे आवाहन यावेळी करण्यात आले.