सीईटी आता दोन वेळा घेण्याबाबत उच्च व तंत्रशिक्षण विभागाची चाचपणी सुरू…

मुंबई: राज्यातील अभियांत्रिकी,विधी, फार्मसी,एमबीए, अशा महत्त्वाच्या अभ्यासक्रमांसाठी घेतली जाणारी सीईटी आता दोन वेळा होणार आहे.याबाबत उच्च व तंत्रशिक्षण विभागाने चाचपणी सुरू केली असून राज्य सामायिक प्रवेश परीक्षा कक्षाकडे दोन पर्यायांच्या व्यवहार्यतेबाबत अहवाल मागवण्यात आला आहे.

अखिल भारतीय स्तरावर अभियांत्रिकी प्रवेशासाठी घेतल्या जाणाऱ्या जेईई परीक्षेप्रमाणे ही परीक्षाही जानेवारी आणि एप्रिल अशा दोन सत्रांत घेण्याकडे विभागाचा कल आहे. मात्र, त्यावेळी राज्यातील परीक्षा केंद्रे जेईई परीक्षेसाठी राखीव असल्याने त्याऐवजी मार्च अखेरीस १५ दिवसांच्या कालावधीतच दोन्ही सत्रे घेण्याचा पर्यायही समोर आहे. सीईटी कक्षातर्फे राज्यभरात ७३ अभ्यासक्रमां साठी १९ विविध सीईटी परीक्षा घेतल्या जातात. त्यापैकी अभियांत्रिकी, फार्मसी, एमबीए, विधी अशा काही मोजक्या अभ्यासक्रमांसाठी लाख भरापेक्षा जास्त विद्यार्थी परीक्षा देतात. भौतिक रसायन-गणित हा गट घेऊन बारावीत उत्तीर्ण होणाऱ्या विद्यार्थ्यांसाठी उपलब्ध असलेल्या सीईटी आणि या लाखापेक्षा जास्त विद्यार्थ्यांचा समावेश असणाऱ्या सीईटी दोनदा घेण्याचा विचार असल्याचे उच्च व तंत्रशिक्षण विभागातील एका अधिकाऱ्याने स्पष्ट केले. या अभ्यासक्रमांच्या सीईटी उशिरा होत असल्याने स्वयंअर्थ सहाय्यित अभ्यासक्रम देणाऱ्या अनेक संस्था विद्यार्थ्यांना स्वतःकडे आकृष्ट करतात. हे टाळण्यासाठी जानेवारी महिन्यात पहिली सीईटी आणि एप्रिल महिन्यात दुसरी सीईटी घेण्याचा विचार सध्या सरकार दरबारी होत आहे. मात्र, याच काळात संपूर्ण देशभरात जेईई परीक्षा होत असल्याने परीक्षा केंद्रांची उपलब्धता हा यातील कळीचा मुद्दा आहे. सध्या सीईट कक्षाकडे स्वतःची परीक्षा केंद्रे नसल्याने परावलंबित्व वाढत असल्याचे या अधिकाऱ्याने सांगितले.

 विद्यार्थ्यांना तयारीसाठी कालावधी कमी मिळेल

मार्चअखेरीस १५ दिवसांच्या अंतरात दोन संधी उच्च व तंत्रशिक्षण विभागाने सीईटी कक्षाकडे याबाबत अहवाल मागवला आहे. यंदा जानेवारीत सीईटी जाहीर झाली, तर विद्यार्थ्यांना तयारीसाठी कालावधी कमी मिळेल, पण तरीही २७ जानेवारीच्या आसपास परीक्षा घेण्याबाबत चाचपणी होत आहे. तसेच जानेवारी-एप्रिल पॅटर्न न राबवता मार्चअखेरीसच १५ दिवसांच्या अंतरात दोन सीईटी घेता येतील का, याबाबतही सीईटी कक्षाकडून अहवाल मागवण्यात आल्याचे या अधिकाऱ्याने नमूद केले. आता सीईटी कक्षाकडून अहवाल आल्यानंतरच जानेवारी- एप्रिल की,मार्चअखेरीस १५ दिवसांच्या अंतरात दोन संधी, याचा निर्णय होणार आहे.