अमळनेर : महाराष्ट्र राज्य पत्रकार संघ मुंबईच्या प्रिंट मीडिया विभागाच्या अमळनेर तालुकाध्यक्षपदी पत्रकार सुरेश कांबळे यांची निवड करण्यात आली आहे. संघटनेचे तालुकाध्यक्ष डॉ. समाधान मैराळे यांनी सुरेश कांबळे यांच्या पत्रकारिता क्षेत्रातील योगदानाची तसेच सामाजिक व संघटनात्मक कार्याची दखल घेत त्यांची या पदावर निवड केली.
पत्रकारांच्या विविध प्रश्नांना व अडचणींना प्रभावीपणे वाचा फोडणे, पत्रकारांच्या हक्कांसाठी संघटितपणे प्रयत्न करणे तसेच पत्रकारिता क्षेत्रात सकारात्मक आणि निर्भीड वातावरण निर्माण करण्याच्या उद्देशाने महाराष्ट्र राज्य पत्रकार संघ मुंबईच्या माध्यमातून विविध उपक्रम राबविले जात आहेत. या पार्श्वभूमीवर प्रिंट मीडिया विभागाच्या तालुकाध्यक्षपदी सुरेश कांबळे यांची झालेली निवड महत्त्वपूर्ण मानली जात आहे.
सुरेश कांबळे हे अनेक वर्षांपासून पत्रकारिता क्षेत्रात कार्यरत असून, विविध सामाजिक विषय तसेच स्थानिक प्रश्नांना आपल्या लेखणीतून प्रसिद्धी देण्याचे काम त्यांनी केले आहे. त्यांच्या निवडीमुळे प्रिंट मीडिया क्षेत्रातील पत्रकारांना संघटित करण्यास तसेच पत्रकारांच्या समस्या संघटनेच्या माध्यमातून संबंधित पातळीवर मांडण्यास अधिक बळ मिळणार असल्याची अपेक्षा व्यक्त होत आहे.
दरम्यान, प्रिंट मीडिया विभागाची तालुका कार्यकारिणी लवकरच जाहीर करण्यात येणार आहे. त्याचबरोबर महाराष्ट्र राज्य पत्रकार संघ मुंबईच्या इतर विभागांच्या तालुकाध्यक्षांची तसेच संबंधित कार्यकारिणीचीही लवकरच घोषणा करण्यात येणार असल्याची माहिती तालुकाध्यक्ष डॉ. समाधान मैराळे यांनी दिली.
संघटनेच्या आगामी कार्यकाळात पत्रकारांच्या विविध प्रश्नांवर आवाज उठविणे, पत्रकारांसाठी मार्गदर्शन व प्रशिक्षणपर उपक्रम आयोजित करणे, पत्रकारांमध्ये समन्वय वाढविणे तसेच पत्रकारिता क्षेत्राच्या विकासासाठी विविध उपक्रम राबविण्यावर भर दिला जाणार असल्याचे सांगण्यात आले.
सुरेश कांबळे यांच्या निवडीबद्दल पत्रकार, सामाजिक कार्यकर्ते, विविध क्षेत्रातील मान्यवर तसेच मित्रपरिवाराकडून त्यांचे अभिनंदन करण्यात येत असून, त्यांच्या नेतृत्वाखाली प्रिंट मीडिया विभाग अधिक सक्षमपणे कार्य करेल, असा विश्वास व्यक्त केला जात आहे.
