अमळनेर : बनावट मुद्रांक (स्टॅम्प पेपर) खरा असल्याचे भासवून शासनाची फसवणूक केल्याप्रकरणी तिघांविरुद्ध अमळनेर पोलीस ठाण्यात गुन्हा दाखल करण्यात आला आहे. ॲड. अभिजित बिऱ्हाडे यांच्या कायदेशीर सतर्कतेमुळे हा संपूर्ण प्रकार उघडकीस आला असून, या धडक कारवाईमुळे बनावट दस्तऐवज बनवणाऱ्यांचे धाबे दणाणले आहेत.
नेमके प्रकरण काय?
पोलिसांनी दिलेल्या अधिक माहितीनुसार, १२ जून २०२५ रोजी दुपारी १ वाजेच्या सुमारास अमळनेर तहसील कार्यालयात अव्वल कारकून अनिल परदेशी यांच्याकडे वीरेंद्र राजेंद्र सोनवणे (रा. गंगापुरी, ता. धरणगाव), कविता पंडित भिल (रा. सत्रासेन, ता. चोपडा) आणि राजेंद्र जगन्नाथ जोशी (रा. अमळगाव) हे आले होते. अंतूर्लीकर विवाह मंडळाच्या विवाह सत्यतेसाठी १०० रुपयांचे प्रतिज्ञापत्र ऑनलाईन नोंदणी करून त्यावर शिक्का व स्वाक्षरी मिळवण्यासाठी त्यांनी ते सादर केले होते. संबंधित प्रतिज्ञापत्र त्यावेळी अनिल परदेशी यांनी प्रमाणित केले होते.
