अमळनेर : येथील जुना टाऊन हॉलमध्ये आयोजित ‘यादें आशाजी की’ या विशेष संगीत मैफलीने अमळनेरकर रसिकांना मंत्रमुग्ध केले. ज्येष्ठ गायिका आशा भोसले यांच्या अजरामर गीतांच्या वर्षावात ही मैफल चांगलीच रंगली. याच सोहळ्यात मान्यवरांच्या हस्ते ‘स्वर संगीत ऑर्केस्ट्रा’ या नामफलकाचे दिमाखदार अनावरण करण्यात आले.
मान्यवरांची उपस्थिती आणि नामफलक अनावरण
कार्यक्रमाची सुरुवात दीपप्रज्वलन व प्रतिमा पूजनाने झाली. यावेळी व्यासपीठावर विद्या हजारे, तिलोत्तमा पाटील, माधुरी पाटील, सुलोचना वाघ, प्रा. शिला पाटील, प्रा. अशोक पवार, भाऊसाहेब देशमुख, राजेंद्रसिंग कालरा आणि प्रा. रंजना देशमुख यांसह अन्य मान्यवर उपस्थित होते. संगीत विशारद वसुंधरा लांडगे आणि उपस्थित मान्यवरांच्या हस्ते ‘स्वर संगीत ऑर्केस्ट्रा’ या नामफलकाचे अनावरण करण्यात आले, ज्यामुळे स्थानिक संगीत क्षेत्राला नवे व्यासपीठ मिळाले आहे.
