अमळनेरमध्ये इमारतीवरून पडून मजुराचा दुर्दैवी मृत्यू; रामनगर तांडा येथील कुटुंबाचा आधार हरपला

अमळनेर :येथील बसस्थानकाजवळील पाचपावली मंदिर परिसरात सुरू असलेल्या एका इमारतीच्या बांधकामाच्या ठिकाणी गुरुवारी सकाळी एक भीषण अपघात घडला. इमारतीच्या तिसऱ्या मजल्यावरून खाली पडल्याने एका ३५ वर्षीय कामगाराचा मृत्यू झाला आहे. गणेश छगन राठोड असे या दुर्दैवी मजुराचे नाव असून, तो पारोळा तालुक्यातील रामनगर तांडा येथील रहिवासी होता.

नेमकी घटना काय?

मिळालेल्या माहितीनुसार, गुरुवारी सकाळी ९ वाजेच्या सुमारास गणेश राठोड इमारतीच्या तिसऱ्या मजल्यावर लिफ्टजवळील जागेत काम करत होता. काम करत असताना अचानक त्याचा तोल गेला आणि तो थेट जमिनीवर कोसळला. या भीषण अपघातात गणेश गंभीररीत्या जखमी झाला.

उपचारादरम्यान मृत्यू

घटनेनंतर त्याला तातडीने येथील स्टेशन रोडवरील सुयश हॉस्पिटलमध्ये हलवण्यात आले. तेथे अस्थिरोग तज्ज्ञ डॉ. दिनेश पाटील यांनी त्याच्यावर प्रथमोपचार केले. मात्र, जखम खोल असल्याने आणि प्रकृती चिंताजनक असल्याने त्याला अधिक उपचारासाठी धुळ्याला नेण्याचा सल्ला देण्यात आला.

जखमी गणेशला रुग्णवाहिकेतून धुळ्याच्या सेवा हॉस्पिटलमध्ये नेत असतानाच, हॉस्पिटलच्या प्रवेशद्वाराजवळ त्याची प्राणज्योत मालवली. धुळे येथेच त्याच्या मृतदेहाचे शवविच्छेदन (Post-mortem) करण्यात आले.

गावावर शोककळा

गणेश राठोड हा आपल्या कुटुंबातील एकमेव कमावता मुलगा होता. त्याच्या पश्चात आई, पत्नी, दोन मुले, दोन मुली आणि एक भाऊ असा मोठा परिवार आहे. घराचा मुख्य आधार गेल्याने राठोड कुटुंबावर दुःखाचा डोंगर कोसळला आहे. रामनगर तांडा येथे अत्यंत शोकाकुल वातावरणात त्याच्यावर अंत्यसंस्कार करण्यात आले. या घटनेमुळे परिसरात हळहळ व्यक्त केली जात आहे.