अमळनेर : शिक्षणासाठी आर्थिक अडचण कधीही अडसर ठरू नये, या सामाजिक जाणिवेतून खान्देश शिक्षण मंडळ संचलित प्रताप हायस्कूल येथे माजी उपमुख्यमंत्री स्व. अजितदादा पवार यांच्या जयंतीनिमित्त २५ गरजू विद्यार्थी-विद्यार्थिनींना शालेय गणवेशाचे वाटप करण्यात आले. पोलीस पाटील तथा शेतकी संघाचे व्हाईस चेअरमन गणेश भामरे यांच्या दातृत्वातून हा स्तुत्य उपक्रम राबविण्यात आला.
कार्यक्रमाची सुरुवात शेतकी संघाचे चेअरमन संभाजी पाटील व गणेश भामरे यांच्या हस्ते स्व. अजितदादा पवार यांच्या प्रतिमेचे पूजन व पुष्पहार अर्पण करून झाली. यानंतर मुख्याध्यापिका श्रीमती एस. पी. बाविस्कर यांनी उपस्थितांचे स्वागत करत कार्यक्रमामागील सामाजिक उद्देश स्पष्ट केला.
विकासपुरुष अजितदादांच्या आठवणींना उजाळा
आपल्या मनोगतात बोलताना गणेश भामरे यांनी स्व. अजितदादा पवार यांच्याशी असलेल्या जिव्हाळ्याच्या आठवणींना उजाळा दिला. अजितदादांच्या विकासाभिमुख नेतृत्वाचा तसेच अमळनेरच्या दृष्टीने अत्यंत महत्त्वाच्या असलेल्या पाडळसरे धरणासाठी त्यांनी केलेल्या विशेष प्रयत्नांचा उल्लेख त्यांनी आवर्जून केला. तसेच, आमचे नेते व मार्गदर्शक माजी मंत्री तथा आमदार अनिल भाईदास पाटील यांच्या मार्गदर्शनाने व प्रेरणेने प्रेरित होऊन या सामाजिक व शैक्षणिक उपक्रमातून स्व. अजितदादांना आदरांजली व्यक्त केल्याचे त्यांनी सांगितले.
